Vakasaqara na kaukauwa vuni VILIAME RAVAI | Monday, July 4, 2016

Era mai sisili tiko qo e na loma ni qara e Sawailau na vulagi saravanua ena nodra taleitaka na totoka ni noda vanua ka ni dau tukuni tu ni parataisi vuni.  Veitaba: VILIAME RAVAI
Era mai sisili tiko qo e na loma ni qara e Sawailau na vulagi saravanua ena nodra taleitaka na totoka ni noda vanua ka ni dau tukuni tu ni parataisi vuni. Veitaba: VILIAME RAVAI

ERA sega ni cegu na vakasaqara kaukauwa vuni na noda kei ira na vulagi mai vanuatani e na nodra dau sikova wasoma na qara mai Sawailau.

Eso na veika e vakaraitaka ko Eroni Sau Sadrata na turaga ni Nabukeru mai na Yatu Yasawa balabalavu.

E tukuna na turaga yabaki 75 qo ni levu na gauna ena gauna e liu era sa dau veitaravi mai na waqa ni saravanua ena nodra dau mai veitaba voli ena loma ni qara qo e Sawailau ka sega ni dau tauri rawa na i yaloyalo ni qara ka ni a tiko kina e dua na kaukauwa vuni sai koya na gata levu ka uluna tiko na daimani.

?Era sa dau mai tovolea vakalevu na vulagi mai vanuatani me ra dau mai vaqara kaukauwa yani kina, ia, e seva kecega na nodra sasaga,? e kaya o Sadarata.

A tukuna talega ko Sadrata ni levu sara na noda era dau mai vaqara na vuku na kaukauwa ni rawata na veta e cake ena cakacaka, kei na vakabisinisi ena nodra dau mai taleva tiko na qara qo e Sawailau.

Ia, e talanoataka o koya ena dua na gauna era a gole yani na kai valagi ena nodra la?ki kerei me ra biuta na koro ka ra vodo yani ki waqa e na nodra la?ki vakasarasarataki kece na lewe ni koro.

?Na neimami dau mai kau tiko oqo e na veiyakavi keimami sega ni kila nai naki vuni esa ra bucina lo tiko na kai valagi ena nodra sa mai vakasagai koya tiko nai taukei ni qara,? e kaya o Sadrata.

E tomana e na nona i talanoa ko Sadrata ni ra sa dau mai kau kece tiko me ra gole ki Tamusua ena vuku ni caka i yaloyalo. 

Ia, na ka dina e mai caka tiko oya ena nona sa ra dau mai qalova luvawale na yalewa ni valagi na qara e Sawailau ena nodra gadreva tiko me ra tabaki koya nai taukei ni qara.

E tukuna na turaga domo kaukauwa qo ni a mai vakayacori talega e kea na kena taba nai yaloyalo yavala na ?Blue Lagoon?. 

?E duavata tikoga mai na i naki ni caka i yaloyalo oqo oya e na nodra via mai kauta tani tiko ena Yatu Yasawa na kaukauwa levu e tiko vua na gata uludaimani qo,? e kaya o Sadrata.

Ia, e tukuna na turaga qo ni ra dau kila vinaka sara ga mai na koro o Nabukeru e na nona koro na nodra dau mai lawaki tiko na lako tiko mai oya ka ra kila ni duatani na sala ni mai sarasara era gole tiko mai kina.

?Au se ka lailai au sa donuya na kena mai sagai me tabaki rawa nai taukei ni qara qo ena nodra sa dau qaqalo luvawale tiko na kai valagi,? e kaya o Sadrata.

E tukuna talega o Sadrata ni a bau donuya na Turaga Talai sa bale ko Ratu Sir Lala Sukuna na kena sagai me mai vesu na kaukauwa e tiko yani e Viti.

?A kidava mai Rairaiwaqa ko Ratu Sukuna ni sa qalovi tiko na gusu ni qara ka ra sega ni vakaisulu na goneyalewa ni valagi era qalo tiko kina e na kena tovolei me tabaki na gata ulu daimani,? e kaya o Sadrata.

E tomana ena nona i talanoa ni a qai qiri mai Lautoka ko Ratu Sukuna ka mani talai ira mai na ovisa me ra mai vesu na kai valagi, ia, ni qai yaco mai ke era sa dui dro ka yali na kai valagi.

Oqo e donumaka na gauna e se dredre kina na veitosoyaki. 

Ena qai tomani tale yani.

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.