Levu na taledi VILIAME RAVAI | Tuesday, April 18, 2017

E RATOU sa vakanamata kina sotasota ni rakavi lewe ya vitu mai Sigapoa na noda matatimi me vaka e tukuna ko Gareth Baber na dauniveivakatavulici ni timi ni Vodafone Fiji 7s.

Ia, e kuria o Baber ni kila deivaki ni levu tu na taledi e Viti, ka levu vei ira oqo e rawa ni ra daramaka na siqeleti ni Viti. E vakaraitaka o Baber ni oti na nodratou qaqa vei Sauca Aferiena 22 kei saiva, ni sa na vakarau yacova na timi ni Viti nai naki a nakita taumada mai.

E kaya ni dodonu me na cakacaka vata kei ira na cauravou, ka ni ra taukena taumada na metali koula kei Ben Ryan (na dauniveivakatavulici e liu ni timi ni Viti) ka dodonu me tomani tikoga na toso ki liu.

E kuria o Baber ni na kauti ira mai na taledi oqo ki na loma ni timi ena loma ni tolu na yabaki mai oqo me vaka ni nona i tavi oya.

Ia, e vakadinadinataka talega o Neil Powell na dauniveivakatavulici ni timi ni Sauca Aferika ni ratou druka saraga vakasavasava vei Viti ena sota mai Hong Kong.

E tukuna o Powell ni mataqali qito e cakava ya o Viti e vakavuna na nodratou tavaiyaya na cauravou ni Aferika ka levu kina na nodratou cala ena loma ni rara me vaka na lutu i liu ni polo ena gauna ni veipasi kei na viritaki tu i liu ni polo ka vaka kina na kena sega ni rawati na polo ena gauna ni caqe vou.

E kuria ni qito vata kei Viti e sega ni gadrevi na mataqali qito vakaoya ka ni na rawa ni sotava kina na kuita.

Na timi ni Viti ena liutaka tiko na Tobu A e na nodrau na sota tiko kina kei na timi ni Hong Kong ni oti na 4 ena 52 na miniti (4:52 pm) ena yakavi ni Vakarauwai, tarava na sota kei Rusia ni oti na 7 ena 50 na miniti (7:50pm) kei nai otioti ni nona qito ena sota tiko kei na timi ni Canada ni oti na 12 ena 6 na miniti (12:06am) ena Siga Tabu.

Na kota fainala ni bilo ena tekivutaki tiko ni oti na 4 ena 30 na miniti (4:30pm) ena yakavi ni Siga Tabu, semi fainala ni oti na 9 ena 10 na miniti (9:10pm) kei na fainala ni oti na 12 ena 20 na miniti (12:20am) ena mataka ni Moniti.

Na timi ni Sauca Aferika ena liutaka tiko na Tobu B ka na sota tiko kina kei na timi ni Igiladi, Varanise kei na timi ni Japani.

Na timi ni Ositerelia ena liutaka tiko na Tobu C ka na sota tiko kina kei na timi ni Argentina, Kenya kei Samoa, ia na timi ni Amerika ena sota tiko kei na timi ni Niu Siladi, Sikoteladi kei Welesi ena Tobu D.

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.