Lakolako ki Ositerelia VILIAME ODRO | Tuesday, April 18, 2017

NODA Railesu e na macawa oqo eda na wilika kina na i tukutuku ni nodrau a gade ki Ositerelia e na yabaki 1963 e dua na veiwatini mai Naitasiri.

Ni tei wilika sara yani na i tukutuku ka volai koto kina:

Sa na dua na siga namaki vei rau e dua na mata veiwatini ko Paula Wakanibuka (51) kei na watina ko Filimaina, mai na koro ko Nakorosule, Naitasiri, na i ka 9 ni Noveba maio oqo, ka ni rau na vuka yani kina ki Adelaide, Ositerelia, me rau la'ki sikovi rau ko Eparama Ketedromo, na luvedrau tagane kei watina ni Vavalagi ka a ko Miss Madge Ackland tu e liu.

E kilai levu ko Paula ni a curu tu e liu e na Tabacakacaka ni Ovisa ka rauta e 24 na yabaki na kena dede, ka dua na gauna e a la'ki vakatawa tu ni Bure ni Kovana mai Lautoka.

E a mai tukuna e na Tusite sa oti ko Filimaina ni oqo e se qai matai ni gauna me rau biuti Viti kina kei Paula, ka sa duatani na levu ni nodrau marau.

Sa tekivu vakasolona sara tiko ko Filimaina e so na iyaya Vakaviti me vaka na ibe, na masi kei na waiwai me la'ki solia vei koya na vugodrau yalewa ni Ositerelia.

E a la'ki kerea sara ko Paula vua na Talai Levu (Mr A C Reid) me kauta tiko e rua na tabua me la'ki soli vata kei na i yaya Vakaviti ka rau vakarau kauta tiko, ka sa tiko sara vua e na gauna oqo e dua na i vola mai na Talai ni Kovana ka vakatarai kina vua me kauta na tabua ki vanua tani.

(Sa tabu e na Lawa i Taukei vua e dua me kauta ki vanua tani e dua na tabua kevaka e sa bera ni vakadonuya taumada na Talai ni Kovana).

Sa na nodrau i tavi na veiwatini mai Ositerelia na nodrau i vodovodo yani e Viti.

E rau mai tukuna talega ko Paula kei watina e na mata mamarau ni rau na tiko voli mai Adelaide me rauta ni tolu na vula ka rau na la'ki taudonuya sara na i matai ni kena marautaki ni sa yabaki dua na nodrau vakamau na tiko mai kea.

'Keirau na cakava sara ga me vaka e dua na soqo Vakaviti.

''Kena i karua ni keirau na ukutaki rau sara ga Vakaviti, ka qai vakacabora vei rau na i yau ka keirau na kauta tiko, a ya na tabua, na ibe, na waiwai kei na masi," e kaya.

E rau na biuti Suva e na macawa oqo ko Paula kei Filimaina me rau la'ki wawa toka mai na Yasayasa Vakara, ka raici iratou na luvedrau ni bera ni gole yani na i lakolako ki Ositerelia.

E kaya talega ko Filimaina ni via rere toka vakalailai e na nodrau na vuka e macawa.

A kaya tale vakaoqo ko Filimaina:

"Au vakabauta ni'u na loloa e macawa ka ni se qai matai ni gauna oqo me'u vodo e na waqavuka, ia e kena vinaka ga ni sa tu rawa vei au e so na vuanikau, ka a vakauta mai ko vugoqu mai Ositerelia me'u gunuva kevaka au lomalomaca e macawa.

O koya e dua na kena dau e na buli wainimate (chemist)'.

A cakacaka tu e liu e na Suva Hotel ko Eparama ka rau sota kina kei na nona dau lomani e na nona a gade mai ki Viti.

E a biuti Viti ka lako ki Ositerelia e na yabaki sa oti, ka rau la'ki vakamau sara e na vula ko Tiseba.

Sa cakacaka sara tiko e na gauna oqo ko Eparama e na dua na loga ni senikau (vakataka na Ba ni senikau e Suva) mai Adelaide.

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.