I tavi ni veisusu VILIAME ODRO | Tuesday, April 18, 2017

ERA osota yani na Valenilotu e na koro ko Muana e na Tabacakacaka o Toga Naqavoka na i tubutubu ni gone ni wilivola ni Siga Tabu, kei ira na veiwekani e na kena vakananumi na nodra Siga Tabu na Gone e na veiyasai Viti raraba.

Taumada e na nodra keba siga dua na lewe ni Matawilivola e na nodra valevakoro e na bogi ni siga Vakarauwai ni bera ni qai vakayacori na Lotu e na Siga Tabu.

E sa bau rogorogo vinaka dina na i vunau era vakayacora tiko na gone e Valenilotu, ka kena i ulutaga tiko na Veivakalotutaki kei na Veiqaravi.

E vakamacalataka na nodra i Vakatawa o Ratu Salia Mavileko ni vakabibitaki tiko na nodra i ulutaga e na yabaki oqo ki vei ira na i tubutubu dau ni veisusu.

'Sa vuqa sara na gauna era sa dau biu tu ga na gone me ra lewai ira ga vakataki ira ka sega ni ra kauwaitaki mai vei keda na i tubutubu.

''Na cauravou lailai ka wasea na kena kakana e sa vakadinadinataka vinaka na nodrau veiwekani na Veivakalotutaki kei na Veiqaravi," e kaya.

Tomana o Mavileko ni nona i vakarau vinaka se i vakarau ca e dua na gone, e na sega ni beitaki tale kina e dua na tamata, e na dusi ga na kabasi ni veivakawai oya kina nona i tubutubu dau ni veisusu.

Kuria ni dodonu me laurai sara vakavinaka na veisusu e dau vakayacori vua e dua na gone, ka ni vuqa na gauna era sa tomika sara vakatotolo na i vakarau ena mona livaliva ka rawa ni veisautaka sara vakatotolo na i vakarau ni dua na gone.

E kaya o Mavileko ni ulutaga me baleta na gone lailai ka vakarautaki mai vale na kena ika kei na madrai, e vakaraitaki sara ga ni nodrau kauwaitaki koya na nona i tubutubu.

Tomana ni gauna oqo e dodonu me tau mai vale na veivakavuvuli vinaka, kei na vosa vinaka me rawa ni matanataka tiko na gone e na veivanua e vakalakova se vulagi kina.

"E sa rui levu na gauna era vakusakusataki kina na gone e na totolo ni bula e da sotava tiko e na gauna oqo, ka sega ni levu na i tubutubu era bole mada me ra tuberi ira e na wilivola ni Siga Tabu," e kaya.

Tinia o Mavileko ni veivakalotutaki ni taba gone kei na veiqaravi e sa tiko ga vua na Kalou Levu ko Jiova, ka dodonu me da dau vakaliuca, ka kabasitaka tiko kina na noda bula e na veisiga.

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.