Duri ena yasana: Gavoka VILIAME GAVOKA | Tuesday, April 18, 2017

Oqo na nona cau ena mcawa oqo o Viliame Gavoka, na lewe ni Palimedi, ena i To ni Veisaqa, ka dau veivakauqeti tiko vei keda na dau wilika na pepa oqo ena vuku ni vakaduri bisinisi, se na cicivaki ni bisinisi eda rawata talega na i Taukei. Ni wiliwili sara yani.

E ka bibi na noda vakailavotaki na kawa i Taukei ka usutu tiko ni noda veiwasei se soli vakasama ena veimacawa.

Ena Na i Lalakai ena macawa sa oti e totoka dina na kedratou i taba na "directors" ni Fijian Holdings ena nodratou a bose tiko ena "board room" ena kena vale ni veiliutaki, oya ena Ramarama House. Me vaka eda kila raraba ni Fijian Holdings e noda na kawa itaukei, ka ra tauyavutaka na noda Turaga Bale ena 1984.

E a tauyavutaki ena $20 na milioni, ka sa vakatubu i lavo sara vakalevu, me taukena rawa e voleka ni $500 na milioni na yau vakabisinisi e daidai.

Me vaka au sa vakaraitaka oti ena vica na gauna sa oti, e dodonu meda vakaduria tale e vica na kabani me vakataka na Fijian Holdings. Au sa vakaraitaka oti talega nira sa tiko rawa e 14 na veikabani ka yavutaki me vakataka na Fijian Holdings, oya o ira na noda dui kabani ni veiyasana.

O ira na noda veikabani oqo eda tekivuna ga o keda ena soli ni yasana, kei na vei sala kece ni kumuni i lavo e noda ga o keda. Era sa bula tu nikua vakabisinisi ka ra yacova tiko e dua na ivakatagedegede e dodonu me tosoi cake tale.

Na i vakatagedegede oqo, oya na kena yavutaki tiko vakalevu na nodra qaravi bisinisi ena veiyau tudei me vaka na vale kei na qele se na yacana vakavalagi na properties.

Oqo era iyau dei ka vinaka meda taukena, ia, era dau vesuka vakalevu na i lavo qaqa ka dodonu me tiko ena bisinisi me rawarawa kina na vakatubu i yau. Eda rawa ni kaya, ni lewe vuqa sara vei ira na noda kabani ni yasana era taukena tu na veivale lelevu eso, ia, era vesuki tu vakadinau ena baqe. Ena qai yaco mai na gauna mera sa saumi oti na i dinau, ia, e dau taura tiko e dua na gauna balavu sara.

E dodonu kina meda vakasaqara eso na veisala eso mera vakailavotaki kina ena i lavo qaqa o ira na noda kabani mera vakatubu i yau vakalevu.

E dua na kena sala rawarawa duadua oya, meda yalovata me dua na i vakacavacava me rawata na i lavo qaqa ena tikina oqo. Au sa vakatututaka vakavica e Palimedi me veisautaki e dua na i vakacavacava ka vakatokai tiko ena yaca "environmental levy", me vakatokai me "qoliqoli tax". Na environmental levy oqo era sauma tiko na saravanua ena 6 na pasede ena veika kece era vakayagataka ena noda veiotela kei na gacagaca kece ni veiqaravi ena saravanua.

Au vakatututaka me vakatuburi kina 8 na pasede, ka yacana na qoliqoli tax, ka wasei kivei ira na noda veikabani ni yasana. E nanumi tiko ni na rawata na saravanua e $2.2 na bilioni ena yabaki 2020; e 8 na pasede ya ena volekata tiko na $176 na milioni.

Ena kena tubu ga na saravanua ena veiyabaki, oya ena levu talega na veika eda vakagolea kivei ira na noda kabani ni yasana. Oqo e vakaitamera sara ka na laveti ira na noda kabani ni yasana ena kena vakaitagedegede eda tatadrataka tu e daidai, ka na vakadaberi keda dei na kawa i Taukei ena vuravura ni bisinisi ena veigauna mai muri.

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.