Dei tikoga na i tutu VILIAME ODRO | Tuesday, April 18, 2017

E DINA ni sa sega ni veisaumitaki au na matanitu, ia, au via vakaraitaka raraba ga vei kemuni na lewe i Viti, niu se turaga ni koro tikoga e na noqu koro.

Oqori na i vakamacala e vakaraitaka raraba tiko mai o Semi Cagilaba ka vakasakei koya na matanitu e na i tutu vaka turaganikoro e na nona koro mai Somosomo e na yanuyanu ni tagimoucia mai Taveuni.

E kaya o Cagilaba ni ra se vakaliuci koya tikoga na nona lewe ni koro e na nona i tutu vaka turaganikoro, ka dina ga ni sa vakasakei mai na matanitu.

E dina ni sa vakadeitaki mai e na Tabacakacaka i Taukei na nona sake, ka sa sega talega ni qai saumi e na nona cakacaka, ia, era sega ni mai via kauwai kina na nona lewe ni koro ka ra tokona tikoga na nona i tutu.

"Keimami na qai bose tiko na lewe ni koro e na macawa mai oqo me baleta na veika e sa yaco oqo, ia, era se vakaliuci au tikoga na lewe ni koro me'u nodra turaganikoro," e kaya.

'Au sa vakaraitaka oti na vuni noqu kilakasamitaka na noqu vakasakei, ia, au vakaraitaka tiko oya e na noqu dodonu vaka i taukei ni qele ka dabe kina na i vakasoso ni livaliva.

"Oti mada na neimami veivosaki, keitou sa na qai kauta cake na neitou vakatutu ki na matanitu me vaka na veivosaki taumada," e kaya.

Tomana o Cagilaba ni dua na veidinadinati e ratou vakayacora kei na matanitu, sa i koya na kena caka na bai ni ua me tekivu mai na koro ko Lamini, ka tavutu sara ki na sitoa levu nei Morisi. Na veika kece oya e sega sara ga ni bau vakayacori, ia, na veidinadinati taumada kei na matanitu, sa i koya me caka rawa ni se bera ni dola na livaliva.

E sega sara ga ni bau kauwaitaka na matanitu na neitou solia wale na neitou qele, ka dolava ga na livaliva, ka sega ni bau nanuma na veiyalayalati taumada me yacova mai na gauna oqo.

"Keimami nuitaka tiko ni na cakava na neitou bai ni ua na matanitu e na vuku ni neimami loma soli e na kena soli na neitou qele me vakayagataki e na veivakatorocaketaki," e kaya.

E vakadeitaka na Vunilewa ni Tabacakacaka i Taukei o Naipote Katonitabua ni vu ni nona vakasakei o Cagilaba, oya ni sega ni yadrava tiko na nona i tavi.

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.