Rawa na toso cake UNAISI RATUBALAVU | Tuesday, April 18, 2017

E DUA na mua ni macawa vinaka vei Viti na kena eda vakanadakuya baleta ni sa qai rawa nai matai ni nodratou qaqa na noda cauravou ena sotasota ni HSBC Sevens Series mai na rara rogo o So Kon Po.

 E rawata tale na qaqa na noda mata timi, ena nodratou rawata na bilo mai Hong Kong ena tolu na yabaki veitaravi.

E rogo na kaila kei  na mauwe, na vakatagi sici, ka cabolo na rokete e dau vakayagataki ena olidei ni Diwali ni sa qaqa na noda  timi ena bogi ni Siga Tabu.

E vakasakiti na nodratou qito na noda cauravou ka ratou vakadeitaka ni se timi naba dua tikoga na timi ni Viti ena qito rakavi le yavitu ena noda vuravura, vakauasivi ni ratou rawata oti ga ena yabaki sa oti na koula mai na sotasota ni Olympics.

 E lewe ni veitalanoa ena veivale, na vale ni cakacaka kei ira na wekada mai na noda veikoro na rairai vinaka ni nodratou qito vata na noda toa ni vala.

 Ni sa oti oqo e ono na sotasota me tekivu mai Dubai ena yabaki sa oti kei na dauniveivakatavulici vou, esa qai mai rawa tale na qaqa ena rara e dau taleitaki kina vakalevu na timi ni Viti, oya mai Hong Kong.

E rauta ni 120,000 na lewenivanua era sarava tu na qito namaki oqo ena rara qo e So Kon Po, ka sega ni wili kina na vica vata na udolu na lewenivanua e vuravura era sarava na qito oqo ena nodra retio yaloyalo se na  mona livaliva.

E Viti, e dau ka ni marau vei ira na luveda ni ra kila ni votai vei ira na qaqa oqo, ka ratou kacivaka toka na cauravou ena gauna eratou sa mai marautaka tu ena loma ni rara na nodratou koula kei na bilo.

 E na macawa oqo, eda sa baci vakanamata tale tu kina sotasota mai Sigapoa, ka sa i karua toka yani ni tutu o Viti ena i tuvatuva ni poidi.

 E rau veisivi tiko o Viti kei na timi mai Sauca Aferika ena 23 na poidi.

 Na timi ni Aferika e liu tiko ena 145 na poidi, ka tarava yani o Viti ena 122 na poidi. E katolu toka yani na timi qaqa ni Igiladi ena 113 na poidi.

 E sa vo tale oqo e tolu na sotasota ni bera ni mai cava tale na sotasota ni vuravura oqo na HSBC Series ni yabaki oqo.

 Me vaka na nona vosa ni veivakadeitaki o Waisale Serevi, e kerea tikoga me na tokoni tikoga na lewe ni timi ena veigauna kece.

 Tukuna ni dodonu  vua e dua na dauniveitokoni me na tu ravita na mata timi oqo, dina ni sotavi na dredre, se sega ni rawati na qaqa, me na dei vinaka tikoga na noda veivakabauti kei na veitokoni kina nodratou bula na noda dauqito.

 Vakaraitaka talega o Serevi ni sega ni rawarawa na veika era dau lako curuma na noda dauqito ena veigauna kece e ra laki qito kina ena dua na sotasota, oya na vuna e dau kerei tiko kina na veitokoni ena veigauna taucoko eratou lade kina ki rara me ratou qito na timi leyavitu ni Viti.

E tu talega na nona veivakabauti na turaga ni Qarani oqo mai Gau  ni dua na vanua vinaka e sa mua kina oqo na noda mata timi, ka levu sara na veika lelevu eratou na rawata na timi le yavitu ni Viti.

 Ena yabaki talega mai oqo ena veisisivitaki kina na bilo cecere ni vuravura ni rakavi le yavitu ka vakayacori tiko mai  Amerika.

 E na mua ni macawa oqo, ni da vakananuma yani na Siga ni Mate, na olidei ni lotu va- Karisito kei na nona Tucake tale o Jisu, e sa tu na vakanuinui ni da na duavata ena nodra tokoni na noda cauravou ena sotasota mai Sigapoa.

 E ratou tiko ena i matai ni tobu na noda mata timi ni ratou na sota vata kei na timi ni Canada, Rusia kei Hong Kong.

Esa tu na vakanuinui ni ratou na lave rara tale mai Sigapoa na noda mata timi ena mua ni macawa oqo, ka nuitaki ni da na marautaka na mua ni macawa balavu eda na vakacagicagi tiko kina.

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.