Rawa e Parisi VILIAME ODRO | Monday, May 15, 2017

E SEGA ni ka vou na qito rakavi lewe ya vitu ki vei iratou na cauravou ka ratou sa na matataka yani na noda vanua e na valataki vanua ki Parisi kei Lodoni e na macawa oqo.

E kaya na dauniveivakatavulici e na timi ni Nasinu o Sailosi Naiteqe ni dina ga ni ra gole e so na gone vovou, ia, na kila ni qito rakavi lewe ya vitu e sa curuma tu na nodratou dra.

?Na gauna ni noda gone, eda sa dau qitotaka na tavaya, se na niu drokai me noda polo ni raka, na ka walega e qai mai vakavulici vei keda oya na lawa e dodonu me vakatabui, me vaka na veivesu e cake kei na vica tale.

?Na ka e da duidui kina kei ira na gone ni valagi, baleta o ira, na ka kece e vakavulici vei ira, me vaka na veipasi na mataqali caqe ni polo kei na vuqa tale,? e kaya.

Ia, na noda timi ni Viti, ni sa dua ga e sa toka vinaka na i tuvaki ni yagona, ka vakakina na yalona, e sega ni dua tale na timi e na vakalatilati e matadratou.

Kuria o Naiteqe ni ratou sa vakacakacakai iratou mai na noda cauravou e na qito ka vakanamata tu kina o vuravura taucoko, ka vakayacori mai Hong Kong.

E levu sara ga na dau vakadidigo e na veiyasai vuravura era tukuna ni na druka sara ga vakaca o Viti vei Aferika ni se bera madaga ni tekivu na qito, ka kena i karua ni ratou sa qoqota oti mai e vica na koula e na sotasota sa oti.

Ia, e leqa ni mai veisautaki na vakanananu kece oya e na nodratou mai kai saiva e na fainala.

?Oya gona na veika au tukuna tiko, ni timi ni noda vanua, ni dua ga e sa tiko ruarua vua na i vakatagedegede ni yago e na kena veta e cake, kei na kaukauwa ni yalo, e na sega ni dua na timi e tao e matana,? e kaya.

Sa nuitaka tu o Naiteqe ni na dua na qito vinaka e ratou na vakayacora na noda toa ni vala e na macawa oqo, ka sa nuitaka ni da na veimasulaki vei iratou na cauravou kei na nodratou dui matavuvale, ka vakabibi talega me da solia na noda veitokoni vei Gareth Baber na dauniveivakatavulici vou.

Me yacova mai oqo na i ka vitu ni wavoki ni sotasota ni HSBC World Rugby Sevens, o Viti e se qai qaqa ga vakadua, a ya mai Hong Kong ka sa i karua tiko e na i tuvatuva ni poidi, ka se liu tikoga na timi tagane ni Aferika.

E vakabauta tiko o Naiteqe ni na dua na i rogo e na sotasota e rua ka sa vo tiko oqo, ka meda na vakanamata, ka vakanuinui ni ratou na vukica na uto na noda cauravou me rawa ni kila o vuravura ni sega tale ni dua e jabeni me vakataki iratou.

Na noda mata timi ni Viti e ratou na tobu vata tiko kei na timi ni Rusia, Samoa kei Ositerelia e na sotasota ni macawa oqo.

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.