Carasoqosoqo na timi ni Rewa VILIAME ODRO | Monday, May 15, 2017

RATOU tomana tikoga na nodratou qaqa na timi ni Rewa e na sotasota ni FRU Vodafone Trophy fixture e na i wasewase e ra se B Division e na siga Vakarauwai mai na rara ni Koronivuli mai Burebasaga.

E dina ni a draki ca ka suasua vakalevu na rara, ia, e sega ni ratoui tu vakasuka na i taukei ni rara e na nodratou vakaraitaka e dua na i vukivuki ni qito rairai totoka, ka ratou dalasai kina na nodratou turaga naita na Naitasiri North Bulls.

E kaya na peresitedi ni timi ni Rewa o Ro Filipe Tuisawau ni dua na qito vinaka eratou vakaraitaka na cauravou e na nodratou cakacaka vata na i yatu e liu kei na i yatu e muri ka rawati kina na qaqa.

Tomana o Ro Filipe ni ratou na tovolea tiko me ratou na laveta cake tale na i vakatagedegede ni nodratou qito me rawa ni ratou yacova na i vakatagedegede e cake e na yabaki oqo.

?Na timi e rua ka sa na qaqa e na sotasota keitou sotava tiko oqo e na curu sara vakatui kina i vakatagedegede e cake. E dua na qito dredre e ratou sotava na cauravou, ia, e na i karua ni veimama e ratou sa qai tuvana donu na nodratou mata ni meke ka vakavuna me ratou tabaka rawa kina e tolu na sikoa.

?Au marautaki ira vakalevu na cauravou e na nodratou vakamalumutaka na kaukauwa ni veika e ratou sotava tiko vei iratou na turaga naita,? e kaya.

Kuria o Ro Filipe ni rautou a veisamulaki vinaka sara ga e na i matai ni veimama, ia, na totolo ga e tiko vei iratou na i yatu e muri ni timi ni Rewa, ka vakakina na nodratou veitauri na i yatu e liu e vakavuna na nodratou qaqa.

Na timi ni Rewa e a vakadruka na timi ni Nasini e na i matai ni nodrau sota, ka rau na sota tiko kei na timi ni Bua, Wairiki e na siga Vakarauwai oqo.

E kaukauwa tale tikoga na timi ni Bua, ka ratou a tai vata kei na timi ni Tailevu e na macawa sa oti.

?Oqo e na sega ni qito rawarawa vei keitou, vakabibi ni na la?ki vakayacori tiko e na nodratou dela ni soso,? kaya o Ro Filipe.

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.