Luvedra na Ratu UNAISI RATUBALAVU | Monday, May 15, 2017

E SEGA ni ra gadreva me na volai na yacadra ena i Vola ni Kawa Bula.

Oqori na veika  e vakamatatataka o Sashi Kiran, e dua vei ira na vakailesilesi ka ra sasagataka me ra sema ki na vuvale nei Tui Noco e Rewa.

E kaya o Kiran ni nodra mai vakamenemenei oqo ka soli vei ira e dua na yaca me ra vakatokai kina, e sega na vosa e vakamacalataka na nodra marau kei na nodra vakavinavinaka.

Ia e vakadeitaka ni VKB e nodra vakatabakidua ga na i Taukei ni vanua, ka sega ni ra gadreva me yaco e dua na duidui se dua na veivakayavalati vei ira na i Taukei. E kaya ni sa tu na nodra i tavi me ra na dau vakamareqeta na yalo ni loloma ka sa tu talega na nodra i tavi ena kena tomani tiko na veimaliwai kei na veiwekani e sa mai bucini oqo ena koro vakaturaga e Nabudrau, e Noco. E na Vakaraubuka sa oti, sa mai tavoci ka ra sa vakatokayacataki na Idia ka a gole mai na tubudra ena gauna ni koloni mera mai cakacaka ena loga ni dovu me ra sa vakatokai me ra ? Luvedra na Ratu.?

E dua na soqo lagilagi ka vakaciriloloma, ka laurai votu talega na matadra na turaga kei na marama ni Idia na nodra marau ena veivakataukeitaki e caka oqo vei ira.

E laki vulagi dokai ena soqo oqo na Marama Bale na Roko Tui Dreketi o Ro Teimumu Kepa ka tukuna ni oqo e dua na i tekitekivu vou kei na nodra lomani na veimata tamata eda sa mai bula veimaliwai vata ena dua na gauna balavu e Viti.

E vakadeitaka na Marama Bale na Roko Tui Dreketi ni soqo e vakayacori oya, e dua na yavu ni bula va Kalou ka sega ni dua na ka me baleta na veika a yaco e Viti ena dua na gauna e liu, se dua na i le vakapolitiki.

A vakayacori na soqo oqo ena rara ni koronivuli e Ratu Sauvoli Memorial School, ka ra tikoga ena soqo oqo eso vei ira na  vakailesilesi liu ena tabana ni Matabose kei Vuravura, na Matabose Cokovata e Iurope, eso vei ira na mata mai na i To ni Veisaqa kei Parofesa Biman Prasad.

E na yabaki sa oti, e sa tekivu tiko mai kina na nodra sasaga me ra kila na veika e yaco vei ira na tubudra era mai kacikaci ni cagi ena waqa na Syria.

Na gauna era rogoca kina ni mai maroroi vinaka ka caka vakavinaka na nodra i bulubulu ena gauna oya, e mai tekivutaki kina na nodra segata me ra sa bukia e dua na veiwekani kei na Tui Noco, Ratu Isoa Damudamu kei ira na koro era tiko ena loma ni tikina ena gauna oya, era qarava na cakacaka ni loloma oqo.

Vakadeitaka na turaga na Tui Noco, o Ratu Isoa ni dua na gauna vinaka ka dua talega na i valavala ni bula e na kilai tani kina na vanua ena vuku ni veimaliwai vinaka vakamata tamata ka sagai tiko oqo ena noda vanua.

E mai vakayacori na kena veiqaravi vakavanua, kei na dua na kakana me marautaki ga kina na vakatoka yaca e sa mai soli oqo vei ira na wekada na Idia.

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.