Na kena bibi na vosa Naipote Katonitabua | Monday, May 15, 2017

Ena macawa qo, meda na veiwasei mada ena bula ni Lialiaci.

Na taro levu meda na taroga se gauna cava e dodonu meda dau lialiaci kina?

Ena yavu ni vakadidike vosa, na liaca se lialiaci e vakaibalebale ni vakilai ni dua na ka e sega, se yali se sa duatani. Ia ni cavuti na vosa qo, ?meda liaci keda? oya meda dui dikevi keda tale mada.

Ena yavu ni vakasama qori, e vakarautaka kina na Tabana ni Vosa kei iTovo Vakaviti e dua na ivola tabaki ena veivulatolu ka yacana na Lialiaci. E yavutaki na yaca ni ivola qo ena vakasama ni vaka sa beci ka sa yali tiko mai na noda itovo kei na vosa. Sa dodonu meda liaci keda ena noda vakamareqeta na noda itovo ka vosataka na kena vosa ni vanua.

Ena noqu sasagataka meu sauma na taro e cake, e veivakurubuitaki dina niu sega ni kunea rawa e dua na yavu meu wasea kina na tamata mai na vanua ena vuku ni bula ni lialiaci.

Me vaka nida dua na tiki bibi ni bula vakavanua na tamata, sa dodonu me tekivu vei keda na bula ni lialiaci ka qai drodrova sobu na vanua. E sa dodonu meda lialiaci ka vakavinakataka na veika e sukusukura tu ena noda bula vakatamata, me rawa ni vinaka kina na vuvale, na noda itokatoka, na mataqali, na yavusa kei na vanua. Ena gauna e veiletitaki kina na itutu vakavanua se na keda qele vakaitaukei, sa dodonu me dabe na vanua ka dikeva na malumalumu sa basika ka vakasaqara na kena iwali me kua ni yaco tale mai muri.

Na lialiaci e dodonu me vakayacori ni laurai eso na itovo vovou ena koro, e dodonu meda lialiaci ni laurai na veisau ena vuvale, e dodonu meda lialiaci ena vuku ni kakana ka sa vakavurea na mate lelevu ena veivalenibula.

Kivei kemuni na dau vakamuria tiko mai na cau ni Tabacakacaka iTaukei, sa dodonu mo ni siqema rawa na isema ni tamata ena vukuna na wekana, na nona itovo, na nona vanua kei na veikabula e tu wavoliti koya. Sa bibi kina meda maroroa, taqomaka ka tutaka na bula ena veika taucoko eda qarava.

Meu tinia, na bula ni lialiaci e dodonu me tiki ni noda bula ena veisiga. Sa dodonu me tekivu vei keda yadua ka dewa yani ena noda vuvale ka drodrova sara na vanua.

Oni sa vakamasuti na lewenivanua moni bulataka na bula ni lialiaci ka vakasaqara na veika vinaka me rawati kina na veiliutaki vinaka kei na bula sautu e Viti.

Ni kalougata.

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.