Qarauna na mate sureti UNAISI RATUBALAVU | Monday, May 15, 2017

EDA wilika tiko ena i takitaki ena macawa oqo na kena veisemati na i sau ni yaqona kei na kena sa voli tiko e levu na kakana ka sega ni bulabula ki na yagoda.

Me vaka eda sa kila vinaka ni sa levu sara tiko na mate sureti e yacovi keda na lewenivanua e Viti, ka sai  colacola levu tiko ki na Tabacakacaka ni Bula kei na matanitu.

E vakilai na tara bi ni mate sureti ki na veivuvale yadudua e Viti.

E levu na bula e mai yalani koso ena vuku saraga ni sa tauvi ira na wekada na mate sureti oqo.

E Viti, eda kila ni da kalougata ni rawa ni tubu kina e levu na kakana bulabula.

Na vuata ena noda vanua e sega ni caka rawa.

Na draunikau me vaka na rourou, na bele, na tubua kei na karamua.

Na kakana dina me vaka na tavioka, na dalo, na uvi, na vudi kei na uto.

Na vuata ni noda vanua era vua ena kena gauna mai na Janueri me yacova sara na vula o Tiseba.

Na taro levu ga e tiko, eda sa vakayagataka tiko ka da kania tiko na kakana bulabula oqori se segai?

E na noda veikoro era voleka e wai, era kana ika bulabula, na kena e saqa bulabula saraga, ka qai yara yani kina na bele se na tubua.

Eda kalougata e Viti, ni sautu tu na noda vanua ena veikakana bulabula eso.

E dodonu me na sega na i iulubale ni da veitalanoataka na veika oqo.

E sa dodonu me da na segata kece na veivuvale e Viti ni sa ka bibi ni noda kania na kakana  bulabula.

Kevaka eda na kania tikoga na kakana e sega ni bulabula ena yagoda, ia meda na namaka sara na tauvimate eso e veiwekani kei na kakana oqori.

Esa ka bibi kina na noda cakacaka vata ka segata vata meda na kania na kakana bulabula, vakavuvale, me rawa ni da susuga talega e dua na Viti e ra bulabula vinaka na lewena.

E na noda segata vata na toso ki liu, e sa ka bibi talega me na bulabula tiko na keda i rairai, na yagoda kei na noda vakasama.

E kena usutu tiko na noda kania na kakana bulabula, meda vakamuria na lawa ni yago ka meda qarauna na noda bula ni veimaliwai kei na noda vakaukauwa yago talega.

Mai Kadavu, e laurai ni ra sa rawa i lavo tiko ena yaqona, oya na kena volitaki ena i sau e vinaka, ia e ra sa sega ni volia tiko na kakana bulabula mai na i lavo era rawata oqo.

Esa dua na bolebole levu vei keda na lewei Viti, ena noda segata me da na kania tiko na kakana e bulabula ka vinaka,

E sa tu na vakanuinui ni da na taura vakabibi na veika oqo.

Meda veitauri iga kei iratou na Tabana ni Bula ena kena vakadewataki ka cakacakataki na tiko bulabula, kei na noda bula ni kana me sa veisau.

Meda sa kania saraga na kakana e bulabula, se meda sa kana mai ena were.

E sa tu talega na vakanuinui ni tukutuku oqo ena rawarawa ni tekivu ena veivuvale.

 Me sa cakacaka vata saraga o tama kei tina ena kena yadravi ka laurai ni vakayagataki tiko ena tolu na kana mai vale na kakana bulabula.

 E sebera ni da bera, ka rawa ni da na sasaga ki na bula e vinaka ka sautu, kevaka ga eda cakacaka vata ena tikina oqo.

Ena daumaka talega ni da kania na kakana bulabula ke sa tiko na noda i teitei se vanua ni teitei voleka ena noda yasa ni vale me rawa ni da kana mai kina.

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.