Veitinani mai Poladi VILIAME ODRO | Monday, June 19, 2017

NODA Railesu e na macawa oqo, eda na wilika kina na nodrau mai sota e Suva e dua na veitinani mai Poladi.

Ni tei wilika sara na i tukutuku e a tabaki e na Na i Lalakai e na yabaki 1965:

ENA macawa sa oti, a yaco kina mai Suva e dua na marama ni Poladi me mai raica na luvena ka me mai vakaitikotiko talega e Viti.

Na yaca ni marama oqo ko Mrs Halina Starzynska, ia ko na luvena e cakacaka tiko e na Tabacakacaka ni Posi kei na Telikaravu e Suva. Na yacana ko Stevenson ka rau sa mai vakamau vata kei na dua na gone yalewa ni Viti.

Na yaca ni gone yalewa ni Viti ko Lusiana Bainivalu (29), e marama ni Bau ko koya, ka luvedrau ko Osea Dau kei Sainimili Radiniqali.

Sa duatani na nodratou veimarautaki na mataveitinani oqo kei budratou mai Poladi e na gauna e ratou sota kina e na wavu levu e Suva.

Oqo e sa qai matai ni gauna me ratou sota kina ko i rau na gone kei tinadrau vata kei budratou ka a i matai talega na gauna me rau sota kina ko Stevenson kei tinana e na loma ni 18 na yabaki sa oti.

Na yabaki oqo e sa na i ka 12 ni yabaki nei Stevenson e Viti, ka tukuna ni sa qai dua na vanua taleitaki duadua vua ko Viti.

Na tamai Stevenson ko Stefan Starzyski, e a manidia tu ni vale ni kabukaburaki mai Poladi ni se bera ni qai mai leqa e na yabaki 1938.

E rau a veiyacani kei na tamana lailai ka Turaganikoro Levu tu mai Warsaw e na i karua ni valu levu o Stevenson, ia, e a kalouca o tamana lailai ni ra a vesuki koya na kai Jamani, ka ra qai vakamatei koya ni sa oti e va na yabaki na nona vakararawataki e na nona sega ni via muria na nodra i vakaro.

E na nodratou mai sota gona oqo na veitinani kei budratou, e sega ni ratou veikilai i vosavosa vakavinaka ka ni sa tataibutubutu sara ga na vosa Vakaperitania nei budratou.

A vuna oqo ni sa qai mai vulica ga ko koya na vosa Vakaperitania e na loma ni dua na yabaki.

?Au vakabauta ni?u sa na qai mai buta vinaka e na vosa Vakaperitania e na gauna au sa mai tiko kina oqo e Viti, a ya niu sa na vosataka tikoga e na veisiga,? kaya o budra na gone.

E na gauna li e sa qai kania kina na kakana Vakaviti ko budrau na gone, sa duatani dina na nona vaqoroqoroya, a ya na qari me tata ka qai vakalolo.

E vakasaqara vua na qari ko na vugona o Lusiana.

Na nona vakamacalataka o budrau na gone na nona i lakolako mai ki Viti, e kaya kina ni voleka ni oti vinaka e rua na yabaki na nona tukia tiko na nodratou katuba na Tabacakacaka ni Curuvanua mai Poladi, ka sa qai vakadonui na nona i vola kerekere ni gade mai ki Viti.

Kuria e na nona kaya ni nona i volatara ni curu vanua (passport) e rauta vinaka e ono na vula na kena caka tiko, ka sa qai vakaraitaki vua.

A kaya ko koya ni vakatarai talega vua me kauta tiko e lima na dola na i lavo qaqa, e qai mai vodo yani e na dua na waqavuka ni Rusia me vuka vaka ki Lodoni.

A qai vakaraitaka talega ko koya ni a rawa walega na nona lako mai ki Viti e na nona vakamuria vinaka na ka e a vakaroti ki vua.

Ni vakatarogi tale, a qai kaya ko koya ni sega ni rawa ni vakamacalataka sara vakavinaka na veika mai Poladi de ratou na qai la?ki leqa wale kina na wekana ka ratou sa tiko mai Warsaw.

?Sa dua dina na veisau levu vei au me?u mai tu vakayawa sara vaka oqo mai na noqu vanua dina.

?E ra tukuna vei au e so niu se bera ni biubiu mai ni dua na ka na katakata ni siga eke, ia, na noqu mai raica oqo e sa totoka dina.

?Au sega ni vakabauta me?u na lesu tale ki Poladi e na noqu sa tiko oqo e Viti, baleta ni?u sa kali au tani sara ga mai kina,? kaya o budrau na gone.

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.