Tavoci ni oti e 10 na yabaki VILIAME ODRO | Monday, June 19, 2017

'TOVOLEA mo vakabauti iko mada vakataki iko (believe in yourself), kevaka o sa domo rua tiko vei ira na lewe 30 vakacaca na dau laga sere yadudua, ka o bulia talega na nodra sere, cava na vuna o sega ni rawa ni lagata ga kina na nomu sere, vakataki iko'

Na vosa ni bolebole oqori e a tukuna o Apisalome Ravula e dua na dau katokatoni, vei qasenivuli vakacegu Iliesa Baravilala, ka vakavuna na nona katokatoni, e na yabaki 2007.

E kaya o Baravilala ni sa qai vakasamataka mai o koya ni ka dina taucoko e tukuna tiko mai na turaga ni Sorokoba, e na yasana o Ba ka sa vakaitikotiko tudei mai Brisbane, Ositerelia e na gauna oqo.

'Sa dina o au mada ga au bulia na sere kei na kena i lagalaga, ia, me'u sa na vakatovolea mada na ka e tukuna vei au o noqu tau.

'Na noqu tovolea ga na i matai ni noqu sere, au sa kaya lo sara ga e lomaqu niu na rawata na ka e bolei au kina qo o Ravula,' e kaya.

Tomana o Baravilala, ni a nanuma me katona na tini na sere oya me tu ga vei koya, ia, e na macawa sara ga sa oti, e sa qai mai tavoca kina na i matai ni nona CD, ni oti e 10 na yabaki, ka sa volitaki tu e na veisitoa ni Procera Music Shop e na veiyasai Viti e na gauna oqo.

'Na katokatoni keirau a vakayacora ga e na nona volau ni katokatoni o Ravulo mai na nona loma ni vale mai Brisbane mai Ositerelia, ka qiria kece o koya na kena i yaya ni vakatagi.

'Au a laga, vakababa, ka domo rua kece e na tini na sere oya,' e kaya.

Kuria ni levu na sere e lagata oya e talanoataki ga kina na baravi ni vualiku kei Tailevu, na veiwekani ni sauca seda, na baravi koula ni sisili mai Ositerelia.

'Na sere ga kei Malake oya e talanoa tiko kina e dua na cauravou ni Nadroga ka a gade ki na yanuyanu ko Malake, ka sega ni kila ni nona talanoa tiko ga oya, sa vola sara tiko ga o Baravilala na kena sere, ka qai kidacala o koya na cauravou oya ni sa tukuna tale vua o Qasenivuli Vakacegu me waraka na kena sere.

'Na i ka otioti ni sere e dua na sere ni yanuyanu mai Ositerelia ka ra tiko ga kina na yago loaloa,' ekaya.

Na gauna oqo e sa tiko tale e dua na nona matasere vou o Baravilala ka yacadratou tiko na 'Baravilala Tribute Serenaders' mai na koro ko Natalau e Sabeto, ka tukuna o Qasenivuli Vakacegu mo ni qai namaka tiko na lewe ni vanua na i matai ni nodratou katokatoni e na dua na gauna lekaleka walega oqo.

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.