Dolavi na vale ni kuvui vou mai Sabeto VILIAME ODRO | Monday, June 19, 2017

NI QAI cilava yani na rarama ni matanisiga ka vakaseyavutaka na i ubi butobuto ni bogi e na mataka lailai ni siga Vakarauwai 3/6/2017, era sa tekivu yacoyaco yani na lewe ni vanua e Betoraurau kei ira na vulagi sureti (Travel Agents) ni veivanua ni saravanua e na mua-i-Ra, me la'ki waraki na nona yaco yani na vulagi dokai ka me la'ki dolava na Vale ni Kuvui levu e na tobu ni waikatakata e Sabeto, Nadi.

E vakaraitaka mai o Qasenivuli Vakacegu Iliesa Baravilala ni a vakayacori na soqo ni (Prayer Breakfast) o ya me vaka e a veiliutaki kina na turaga i Talatala ni Tabacakacaka ko Sabeto o Rev, Netani Jitoko.

E kaya o Baravilala ni gauna ga e yaco yani kina na nodra vulagi dokai o Isimeli Bose na CEO se Vunilewa ni Ba Provincial Holding Co. Ltd; e sa tekivu sara e dua na lotu lekaleka ka dua na kena vakasama vakayalo, ka bau rogoci talega kina e rua na nona sere ni lotu na cauravou lailai domo koula mai na Siti ni Suka mai Lautoka o Mosese Baledrokadroka.

Tomana o Baravilala ni cava na i wasewase ni veiqaravi vakayalo, sa tekivu sara na i katalau e na i coi ni ti totoka dui roka ka dau kilai tani kina na vanua o Betoraurau! 'Sa yawa du riki' dau tukuni mai Naviti Yasawa.

Kuria o Qasenivuli Vakacegu ni oti o ya e sa qai mai memela toka yani vakamalua na domona na cauravou lailai vasu ki na Sauca o Mosese me ra vakamarautaki tiko kina na vulagi sureti e na kida ni mataka rairai totoka e na yasa ni tobu waikatakata e Sabeto mai Nadi.

E kaya o Baravilala ni a qai tekivutaki na i karua ni wasewase ni soqo e na dua na veiqaravi vakavanua totoka ki vua na vulagi dokai.

Oti oya e sa qai mai lagata yani o Mosese e dua na sere vou ni 'TIFAJEK' se na vanua ni kuvui vou oqo, ka cavuisaravi na cauravou lailai ni koro ko Notokalau mai na yanuyanu ko Ovalau oqo e na memela ni domona, ka taladrodro kina na nodra tiloma na medra bilo ti na vulagi sureti.

Oti o ya e sa qai sureti na vulagi dokai me la'ki dolava na vale ni kuvui vou, ka i lutua tiko ni soqo e na mataka oya.

'Sa totoka dina vakaoti ni da qai curuma ga yani, e da sa vakila sara ga na kena katakata ni teregi keda mai na cawa bulabula ni wai katakata, ka da vakila sara ga na veitosoyaki ni dra e na noda nave.

'E bulabula vakasauri na noda vakasama e na veiciciyaki ni noda dra, ka da rawa ni vakila ni curuma na noda qavokavoka, ka rai kina vakavinaka na yaloka ni matada.

'Sa rauta me ra osota tiko na lewe ni vanua kei ira na vulagi mai na veiyasai vuravura, baleta na bula sara ga e kunei e na vanua vakaoqo.

'Keimami vakavinavinaka vakalevu vua na marama Manidia Liu o Miliana Racule mai Vadravadra, Gau, e na Seda kei Viti, ni a dolava tu vei keimami na loma ni bai ni sisili oqo, me kakua ni saumi e na siga taucoko, dau tukuni ga mai na Sauca,'Free for one day only,' e kaya.

Kuria o Baravilala ni soli vei ira na vulagi na galala e na veika cava ga e ra via cakava e na siga oya, me vaka na sili waikatakata, mud pool se boro qele se ko kuvui sara, sa yawa na 'TIFAJEK HOT SPRING', Sabeto ga sa rawata!

Tomana o Qasenivuli Vakacegu ni a soli talega na galala vei ira na vulagi sureti me ra sa vakayagataka yani na i solisoli ni veiqaravi oya mai na TIFAJEK, sa yawa dina! Io o Nadi Ko!

E kaya o Baravilala ni a tavoci tale tiko ga e na siga oya e dua na nona matasere vou, ka yacadratou na 'Baravilala Tribute Serenader', ka ratou lagata ka katona talega e so na nona veisere makawa.

Kuria o Baravilala ni ratou turaga taucoko ga ni koro ko Natalau e Sabeto, Nadi ka mo ni qai namaka tiko na lewe ni vanua na volitaki ni nodratou katokatoni vou e na dua na gauna lekaleka walega oqo.

E kaya o Baravilala ni gauna e sa oti kece kina na soqo namaki, ratou sa qai mai veivakamarautaki toka yani na 'Baravilala Tribute Serenaders' me yacova ni sa la'ki dre ko Malolo e na yakavi o ya.

Sa vakaciriloloma dina ni sa vagagalu na vanua e qai la'ki voqa yawa tu yani e na delana na Tualeita na kamikamica ni domodratou na matasere oya, ka kuria yani na rairai totoka ni loma ni vanua ni sa la'ki dromu na matanisiga.

Kuria o Qasenivuli Vakacegu ni sa tiko talega na nodratou i tuvatuva na komiti ni Tifajek Hot Spring e na kena na tara e vica na bure Vakaviti (Home Style Bure) e na loma ni bai ni vanua ni veiqaravi oqo, kei na Valenikana (cafeteria).

Sa i koya oqo na veika e sa tiko rawa e na vanua ni sisili o ya - hotspring (tobu ni waikatakata), mud pool (tobu ni boro qele), massage parlour (vanua ni veimasi) kei na ka vou na steam bath (vanua ni kuvui).

E kaya o Baravilala ni tau ya $20 vei ira na vulagi, ka $10 ga vei keda na i Taukei.

Ni sa levu ga na wai ni vanua, vakusakusa sara ki na Tifajek Hot Spring me lai dua sara na kena kuvui, se vavei'

Sa koto oqo e ra na sere vou ni Tifajek, Sabeto, Nadi, ka a tavoca o Mosese e na mataka oya.:

1. Niu vakasarava na i rairai ni vanua

Tifajek vei au, totoka vakadua

Mud Pool, Hot Spring, taleva na saravanua

Kei na 'Steam Bath' mai dola tu ni kua.

Taletale: Tifajek, Tifajek

Tifajek, wananavu vakadua

Tifajek, Tifajek

Tifajek cibitaka tu ni kua

2. Mili Racule na kena Manidia

Rogo tu ko Gau, Yatu Lomai, kena i cavu dina

Veiliutaki, Matata ena veisiga

Lewe ni Komiti ni Tifajek, duavata kina.

Taletale: Tifajek, Tifajek

Tifajek, wananavu vakadua

Tifajek, Tifajek

Tifajek cibitaka tu ni kua

3. Dela ni Ravoravo se na Tualeita

Kabu kei Conua, dau lutumi Sabeto wasoma

Cawa malua tu na tobu ni waikatakata

Sai divi kei Wailoko veidraki kece sara

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.