Iyau mai na loma ni qele VILIAME GAVOKA | Monday, June 19, 2017

EDA veiwasei tiko ena noda vakailavotaki na kawa iTaukei me vaka ni da dravudravua sara tiko ena tikina oqo.

E dina e levu na veika eda taukena, ia, e sega ga vei keda na i lavo, ka vaka meda mata sarasara tu ni ra sa rawa i lavo tiko vakalevu o ira na wekada veimata tamata eda lewe ni vanua vata.

E vuqa na tikina au sa ceuta cake mai meda vakanamata kina ena kena sagai na veivakailavotaki, ka dua vei ira na i yau e loma ni qele.

Ena vakadidike era vakayacora na kena dau, e kunei ni tiko e Viti na mataqali vatu makawa sara, ka vakabauti nira tiko kina na veiyau talei eso, ka so me vaka na vatu, era na yaga ena cakacaka ni veivakatorocake eso.

Ia, na noqu nanuma ka'u gadreva meda ciqoma, oya, meda dabeca dei toka na veika e loma ni qele, wili kina na veivatu eso, ka me kakua ni soli vakarawarawa.

Oqo au sega ni kaya me tarova na veivakatorocaketaki, au kaya tiko mera rawata vei keda na kena i dole vakailavo e veiganiti.

Eso nikua era vakabibitaka me soli vakarawarawa na i yau mera cakacaka kina o ira na noda gone.

Oqo au sega ni duavata, ni vakacakacakataki e dua ga na tikina na veivakatorocaketaki, ka sega ni o koya taucoko sara.

Eda raica ena veigauna sa oti yani ni dina era cakacaka na noda gone, ia, e sega ga ni veisautaka na noda vakailavotaki, se vakatorocaketaka na veika vakaitikotiko e baleti keda; me vaka na vakavaletaki, na vakamotoka kei na veika talei eso era rawata na veimata tamata eso e Viti.

Na tikina e bibi vei au, oya, meda rawata mai na i lavo ena veika era kelia se taqea na dau ni bisinisi ena noda qele.

Oqo me tuvani vakamatau, ka liu taudua me veiganiti; ka qai kena i kuri na cakacaka, na veikonitaraki tale eso, se na gacagaca cava ni veiqaravi era na votu cake mai.

E daidai e buwawa tiko na lawa e vauca nai yau e loma ni qele, se ena ruku ni qoliqoli, ka dodonu me vakamatatataki.

Keitou sa veitalanoa tiko kina e vica na veiwekani meda vakadikeva mada na lawa ena tikina oqo vei ira na wekada e Papua Niu Kini.

E vanua vutuniyau sara era i yau bula o ira mai keya, ka lau- rai talega ni nodra sara ga na kena vinaka vakailavo o ira na i taukei ni yau bula.

Eda raica ni vica na veibisinisi lelevu me vaka na vei otela e Viti e nodra na i taukei ni yaubula mai Papua Niu Kini.

Kivei keda e Viti, kevaka eda kaya me wasei eso na i lavo mai na koula e rawa mai Vatukoula; ke ratou sa vutuniyau sara o ira era taukena na qele e kea.

Oya eda duatani kina o keda e Viti kei ira mai Papua Niu Kini, ka dodonu meda qaqarauni kina.

E rogoci ni tiko eso na i yau talei ena gusu ni wai ena noda veiuciwai lelevu, ka sa tekivu na kelikeli, ia, eda sega ni kila se na cava e nona na i taukei ni qoliqoli.

E baci vaka me yalataki ga kivei keda na cakacaka, me vakataki Vatukoula ga.

E dodonu meda dabeca dei toka mada na vei yau vakaoqo, ka yacova ni sa vakadavori vakavinaka na kena lawa e Palimedi, me yaga vakailavo kivei keda na kena i taukei.

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.