Bukete dole UNAISI RATUBALAVU | Monday, June 19, 2017

ENA macawa oqo e da wilika tiko kina na i wiliwili ni goneyalewa e ra sa mai bukete dole ena loma ni yabaki sa oti.

E kauwai sara tiko na lewenivanua ni levu vei ira na goneyalewa era sa mai bukete oqo, oya ni ra yabaki 15 ka lako sobu.

Esa dua dina na bolebole levu vei keda kece, ka dodonu me da na kauwai ka sasagataka vata ena kena laurai e dua na i wali se rawa ni vakalailaitaki na leqa oqo.

Me vaka eda na kila vinaka, ni kevaka era sa na bukete dole tiko yani e levu vei ira na noda goneyalewa, e ra sa na sega kina ni vakaotia na nodra vuli ka mai tao tu na nodra sasaga ena vuku ni vuli kei na cakacaka.

E na dua talega na bolebole ki na nodra loma ni vuvale, ka duidui tu eso na i tubutubu ena nodra na ciqoma na i tukutuku vakaoqo ni sa mai vakacalaka na luvedra goneyalewa.

E na nona vosa tiko mai ena noda niusiveva oqo o Nai Talatala Epineri Vakadewavosa, tukuna ni sa tiko na noda i tavi ka vakabibitaka tiko na kena tauyavutaki ka me na vakabibitaki na bula qaqa ni dua na vuvale.

Me vaka eda kila vinaka talega, ni sa levu na vuvale ena gauna oqo era sa mai sotava talega na dredre.

Ia e sega ni tukuni kina, ni da sega ni rawata e dua na i wali, ia kevaka me da loma vata ga ena kena tarai cake e dua na vuvale vinaka, ena rawa kevaka ga eda sa vakabauta ni da na rawata.

Na i tukutuku talega eratou vakasokumuna mai na tabana qo ni vuli na National Substance Abuse Advisory Council e rawa tiko kina vei keda e Viti meda kidava tiko na draki ni bula kei na bolebole era sotava tiko na noda i tabagone ena gauna oqo.

Ni sa tiko na i tukutuku vakaoqo, ka qai dau vakadewataki meda kila, e rawa ni vukei keda tiko ena noda kidava na vanua e luluqa kina na noda veisusu kei na noda veiqaravi na i tubutubu.

Eda na rawa ni beitaka e levu na ka e na rawa ni yaco kina na leqa oqo, ia sa ka bibi ga me da na kila ni tiko na i wali ni leqa.

E mai vakabibitaka talega o Talatala Vakadewavosa na kena dau soli vakawasoma na i vakasala vinaka mai vei ira na qase.

Ka me tiko na gauna ni nodra vuli kei na veitalanoa na i tabagone me ra rawa ni veiwaseitaka na leqa era dau lako curuma.

E da sebera kece ni da taucoko, e dau tu na luluqa eso ena veiyalava ni bula kecega eda bula kina.

Eda vakavinavinakataka talega ni sa soli oti tu vei keda na yalomatua kei na digidigi ena veisiga.

Esa ka bibi na nodra na vaqaqacotaka tale na marama tina, na nodra dau vosa ka vakasalataki ira tiko na luvedra yalewa ena gauna oqo.

Esa ka bibi talega na nodra vosa tiko na turaga tama vei ira na luvedra tagane ena nodra rokovi ka maroroi na nodra goneyalewa.

Na i matai ni koronivuli ga oya na noda vuvale, ka sa bibi talega na nodrau na matanataka o tama kei tina na i vakavuvuli e rau vakatavuvulitaka tiko.

O ira na luveda era na raici eda tikoga na i tubutubu kei na i valavala ni noda bula.

E bibi ga me da raica na leqa e sa tara tiko na nodra bula na noda i tabagone ka da cakacaka vata ena kena vaqarai na kena i wali, ka meda veitokonitaka na nodra tuberi tiko na noda i solisoli ni sai ira oqo era na veisosomitaki yani vei keda ena veisiga ni mataka.

Esa ka bibi talega me da na lomani ira na luveda ka vakasalataki ira tiko ena vuku ni bolebole kei na dredre ni bula e sotava tu na nodra i caba.

Eda na sega ni biuta ga ki na lotu me na walia na leqa oqo se na vuvale e sotava na bukete dole, esa tiko kina na noda i tavi kece.

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.