Sega ni kama VILIAME RAVAI | Monday, June 19, 2017

ENA loma ni 17 na yabaki noqu cakacaka voli vakadauniboko buka au sa qai raica vakadua e dua na ka e veivakurabuitaki. Oya na veika e vakaraitaka ko Amori Ceinaturaga Vakarewa Vererusa ena gauna e ratou a vakadidike tiko kina na Tabana ni bokobuka kei na ovisa ena valenivolavola ni yasana o Cakaudrove.

'Rauta tiko na ono na kaloko (6 am) ena mataka ni Vukelulu sa oti keitou a curuma na vale ni volavola ni yasana o Cakaudrove me keitou vakadikeva na vu ni kama ni vale,' e kaya o Vakarewa.

E kuria na nona i tukutuku na turaga ni Sawaieke mai Gau qo ena gauna e ratou vakadikeva tiko kina na rumu ka tekivu yani kina na kama e vakauqeti koya me lesuva tale mada na ruku nei Roko Tui Cakaudrove.

'Au sa vakasarava tu na loma ni rumu qo ni sa loaloa vakadua ena i vola ka ra kama kei na i tutu ni vola ka vaka kina na 'lap top' nei Roko,' e kaya o Vakarewa.

E tukuna o koya ni a lauta na matana e dua nai vola vavaku ka sa kama toka na waqana e dabe toka ena dela ni vola ka ra sa kama tu.

'Au mani cereka na i vola qo au qai kila ni i Vola Tabu ka sa kama na waqana, ia na matai ni daruniveva mai nai i vola ni Vakatekivu me yacova na i otioti ni wase ni Vakatakila, e sega vakadua ni bau kama e dua na drauna,' e kaya o Vakarewa.

E kuria o Vakarewa ni a mani kacivi nona i tokani mai ko Akuila Mannix ka rau cakacaka vata tiko me mai raica talega na Vola Tabu ka sega ni bau kama.

'Au sa qai vakadinadinataka na kaukauwa e tiko ena Vosa ni Kalou kei na dina ni nona vosa ka ni kama yavu na veika kece e tiko ena loma ni rumu oya ia na nona vosa e sega vakadua ni bau kama se viavia kama vakalailai e dua na kena i wase,' e kaya o Vakarewa.

Vakaraitaka mai o Talatala Epineri Vakadewavosa, na Vunivola Levu ni lotu Wesele ni sega ni ka vou ka dua talega na i tukutuku marautaki ena nona vakaraitaka tiko na Kalou na nona cakacaka mana e Viti.

'Esa dua dina na i tukutuku marautaki ka ni da kila tu na yaga kei na mana ni nona Vosa na Kalou.

'E sega ni ka vou, ena gauna e liu e dau sagai me vakamai ka me kua ni vakatetei na Vosa ni Kalou ena veiyasai vuravura, e sega ni rawa baleta ni kaukauwa ka sau na nona Vosa bula na Kalou.

'E dua na i vakatakilakila vinaka oqori, baleta e via vakaraitaka na Kalou na noda wilika na nona Vosa, meda rawata kina na bula e sa vakarautaka tu me baleti keda kece,' e kuria o Talatala Vakadewavosa.

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.