Bulabula o ira na Nasi VILIAME ODRO | Monday, August 7, 2017

NODA Railesu e na macawa oqo e da na wilika kina na nodra i soqosoqo na Nasi.

Ni tei rogoca sara na i tukutuku ka a tabaki e na na Na i Lalakai e na yabaki 1965, me baleta na ulutaga ka no oqori e cake:

Ni bera ni caka na i Kawalu ni Bose Levu Vakayabaki ni i Soqosoqo Vakanasi, na Viti Registered Nurses Association, e na i ka 24 ni Veverueri sa dromu, era a sivia vakalailai ga na 300 na lewe ni soqosoqo ko ya.

Ia, ni vakayacori oti ga na bose e na vica na siga mai ki muri, e sa sivia na yalayala ni 400.

Oqo sa i vakaraitaki ni kena sa qai tu dina na i soqosoqo e na i vakatagedegede e cake.

E vaka koto mai oqori e dua na temo ni vosa nei Arieta Matairakula na Vunivola ni Viti Registered Nurses Association e na nona i vola mai ki na Na i Lalakai.

E cavuta tikoga mai kina ko koya na veivakacaucautaki ni nona i soqosoq vei ira ka ra dau vukea e na veigauna sa oti.

Sa i koya oqo na lewe ni vola taucoko nei Staff Nurse Arieta Matairakula:

Au via vakavinavinaka vakalevu sara vei kemuni na neimami vulagi dokai ko ni a yaco yani ki na soqo ni kena dolavi na i Kawalu ni Bose Levu Vakayabaki ni i soqosoqo vakanasi, na Viti Registered Nurses Association, ka a caka e na bogi ni Vukelulu, na i ka 24 ni Veverueri sa dromu mai na Epworth House e Suva.

E dina ni a lekaleka ga na gauna e vakauti yani kina na i tukutuku ni veisureti, ia, na nomuni yaco yani sa dua na ka e marautaki sara ka mani yaco me uasivi vakaoti kina na soqo.

Au via vakaraitaka talega eke na momona ni nona vosa ni dola bose na i Liuliu Levu ni Nasi e Viti ko Mrs U Stevenson, kei na nodra tiko kina na i Liuliu ni Tabacakacaka Vakavuniwai e Viti (Dr C K Gurd), na i sosomi ni Turaganikoro e Suva(Ratu Livai Volavola) kei rau na Turaga Mata i Taukei ki na Bose Lawa (Hon Semesa Sikivou kei Hon Josua Rabukawaqa), na Metereni ni Valenibula Levu e Suva, na Qasenivuli Liu ni Koronivuli ni Nasi mai Tamavua, na Marama na Tui Nakelo Adi Litia Waqainaweni, Ratu Vakatotomi (Wame Waqanisanini) kei kemuni na turaga kei na marama sureti.

Au kinoca dredre na noqu via tukuna talega na noqu vakavinavinaka vuabale vei kemuni na dau veivuke e na taudaku kei na loma ni i soqosoqo oqo.

De vinaka mo ni kila tu ni se qai kena i kawalu ga oqo ni yabaki ni nona buli na i soqosoqo ka keimami vakaciciva tiko na marama e so, ka sega soti ni keimami vakaiyaragitaki vinaka e na veika ni bula vakaisoqosoqo, ka ra veituyaki e na veiyasai Viti na lewena.

Ia, na nomuni veivuke ga kei na veituberi sai koya ka yacova tu kina e daidai e dua na i vakatagedegede uasivi.

Ni bera na bose, e sivia vakalailai na 300 na lewe ni soqosoqo oqo, ia, ni vakayacori oti ga na bose e na vica na siga mai ki muri, sa tubu sara ka sivia na 400.

Oqori e dua na i vakaraitaki ni sa qai tu dina na i soqosoqo e na i vakatagedegede e cake.

Vei kemuni kece na dau lomasoli ka vukea na i soqosoqo oqo, vinaka vakalevu!

Na i Kawalu ni Bose Levu Vakayabaki ni i Soqosoqo ka vakayacori e na vula sa dromu, e ratou lesi kina na marama oqo me ratou lewe ni Komiti-e-cake ni i Soqosoqo e na yabaki 1965 ki na 1996, ka ratou digitaki e na veidigidigi vuni:

Peresitedi, Laisa L Batigai; Vukevuke ni Peresitedi Adi Asenaca Volavola; Vunivola, Arieta Matairakula; Vukevuke ni Vunivola, Merewalesi Vudiniabola; Dauniyau, Mavoa Kurimudu; Vukevuke ni Dauniyau, Bulou Jiojina Vakuruivalu.

Oqo ko iratou na lewe ni Komiti: Sofaia Kamakorewa, Seruwaia Sousou, Fulori Waibuta, Iliseva Levula kei Kasanita Batirerega.

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.