Dola ni valenivuli mai Vanuakula e Naitasiri VILIAME ODRO | Monday, August 7, 2017

NODA Railesu e na macawa oqo e da na wilika kina na i talanoa ni kena dola na vale ni vuli mai Vanuakula, Naitasiri.

Ni raica sara mada yani na i tukutuku kei na i taba, ka a volai koto e na yabaki 1965 me baleta na koronivuli oqo:

Na i karua ni siga ni vula ko Jiulai sa na dau vakananumi tu e na veigauna mai muri e na i tukutuku ni Koronivuli ni Lotu Katolika mai Vanuakula, Waimaro, Naitasiri me dua na siga talei sara, ka ni a cavuikalawa kina ki liu na Koronivuli o ya e na kena a dola e dua na nodra vale ni vuli vou, totoka ka tara vakamatau sara.

A la?ki dolava na vale na Turaga na i Liuliu ni Lotu Katolika e Viti kei Rotuma ko Bisovi V Foley.

E ratou a lewe ni lakolako vakalotu oqo na Turaga na Bete mai Natovi, Tailevu kei na so tale na Bete kei na Sisita.

E ratou a tiko talega e na soqo ko ya na ?District Officer Central? J D Devereili, na Roko Tui Naitasiri Epineri Saumaiwai, na ?Agriculture Officer North-Central? Berenado Vunibobo kei iratou na marama na dui watidra.

Era a sureti talega kina na Qasenivuli Liu mai na veikoronivuli e na Waidina, ka marautaki vakalevu sara na nona tiko talega e na soqo na i Talatala Qase ni Lotu Wesele mai Waimanu ko Rev Torolevu.

A vakayacori vua na Turaga Bisovi na veiqaraqaravi kece sara vakavanua.

Ni yaco yani ki matasawa na i lakolako vakaturaga sa caka sara mai na i vakasobu ka tubera na kena kamunaga ko Ratu Jone Tokairavua mai Nadakuni.

Na qaloqalovi e a tubera na Tui Waimaro ko Ratu Apenisa Sauvakarua.

E kaya e na nona vosa ni tubetube ni ra sa marau ka vakavinavinaka na lewe ni vanua ko Waimaro e na cakacaka levu ka sa rawa tu oqo, vakabibi ki na veiliutaki maqosa kei na vosota.

A tu yaqona ko Ratu Valetino Nawaqaliqali.

Ni oti na veiqaraqaravi e sa qai tauca na vosa ni vakavinavinaka ko Ratu Imanueli Seru.

E vakaraitaka na nodra vakavinavinaka na lewe ni Lotu Katolika mai Soloira vua na Turaga Bisovi e na nona yaco rawa yani me la?ki dolava na Vale ni Vuli vou.

E kaya talega ko Ratu Imanueli ni ra kila vinaka tu na lewe ni Lotu ni a tauvi mate bibi na Turaga na Bisovi ena dua na gauna balavu.

Era kila talega na nona ogaoga taumada e na Bose Levu mai Roma, ka sa i koya oya na vuna e ra doka ka qoroya kina na lewe i Waimaro na nona yaco rawa yani me la?ki vakayacora na i tavi bibi ni dola vale.

Ni sa vosa na Turaga Bisovi, e a vakavinavinakataka taumada na veiqaraqaravi vakaturaga ka a vakayacori ki vua ka kainaka ni vakasinaiti na lomana e na marau ni sa raica na veisau levu e na Koronivuli ni Lotu oqo mai na kena i tuvaki mai na veigauna sa oti.

A vagolea talega na nona vakavinavinaka vua na Turaga Bete e na nona gugumatua kei na nona veiliutaki vinaka.

A qai kerei ira na lewe ni Lotu me ra vukea ka karona na nodra Bete. A vakabibitaka talega na Turaga na Bisovi me da taqomaka matua na noda i vakarau vakavanua.

E vakavinavinakataka talega vakalevu na nodra tiko vakalewe levu e na soqo oqo ko ira na lewe ni Lotu Wesele vata kei na nodra i Talatala.

E kerea na Turaga na Bisovi ka kila ni na toro cake tikoga na nodra veikilai vakalotu me rawati kina na tiko vinaka, tiko veilomani kei na tiko sautu e na veigauna mai muri.

Ni sa tini na soqo vakaturaga, e sa qai vakayacori na i vakasigalevu e na vakatunuloa, ka ra kana vata kina ko ira na sureti vata kei ira na lewe ni vanua.

A qai vakayacori na cakacaka bibi ni dola Vale ni Vuli ni sa voleka na veimama ni 2 na kaloko e na yakavi.

E a vakayacori taumada na Lotu e na kena taburaki na vale vou ka kerea kina na Turaga Bisovi vua na Kalou me taqomaki ira ka vakararamataki ira na gone kei ira na qasenivuli era na vakayagataka na Vale ni Vuli.

Ni sa dola oti na vale, sa qai vosa o Ratu Apenisa na Tui Waimaro e na vukudra na qasenivuli. E a dua talega na nona vosa vakalekaleka na Turaga Bisovi, ka ra qai sarasara yani na lewe ni vanua e na loma ni vale.

Na balavu ni vale e 106 na fiti (sivia na katu 16), ia, na kena kubu e 20 na fiti (sivia na katu tolu), kei na raba ni kena varada simede e 6 na fiti (katu dua).

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.