Kidroataki na voca ni PC121 e Mataicicia VILIAME ODRO | Monday, August 7, 2017

?NA gauna sara ga keimami se vakamalekata no kina na dreta na neimami i tutuvi e na cagi batabata ni mataka lailai ka curuma toka mai vakamalua na neimami vale mai na uciwai na Waidina e na mataka ni siga Vakarauwai e na i ka 24 ni siga ni vula ko Jiulai e na yabaki 1999, keimami sa rogoca e dua na cabolo ka rogo levu e na yasa ni neimami koro.

?Keimami sega ni taura soti sara vakabibi na rorogo o ya, ka ni siga talega o ya keimami vakavakarau sara tiko ga kina na la?ki sarava na qito levu ni ?Farebrother Cup? ka rau na veitavulaki kina na timi ni Naitasiri kei na timi ni Lautoka mai na Ratu Cakobau Park mai Nausori?.

Oqori na veimala ni vosa e cauraka toka mai o Ratu Mikaele Seruitukana mai na nona loma ni vale, ka sa turaganikoro tiko e na nona koro ko Delailasakau e na Tikina o Waidina e na yasana o Naitasiri, e na macawa sa oti.

E kaya o Seruitukana ni ra nanuma ga de sa lutu e dua na yaseyase vakaitamera e yasa ni koro e na mataka o ya.

?E rideu ka sokunu na yagoi keimami ka ra veiciciyaki na neimami sala ni dra e na rorogo ni kacabote o ya, ia, ni keimami cici yani e tautuba e se butobuto na loma ni koro, ka keimami sega ni raica rawa e dua na rarama, salavata na batabata ni tegu e na dela ni veico, ka vakavuna na neimami lade tale vakatotolo e loma ni vale, ka la?ki vakaotia na neimami moce, ka mai guilecava tale yani na rorogo rerevaki e na mataka caca o ya,? e kaya.

Tomana ni gauna e sa rarama mai kina na vanua, era sa maqusa ka vakavakarau na lewe ni koro e na gole ki Nausori me ra la?ki tokona na valataki vanua ni nodra timi ni yasana.

E kaya o Seruitukana ni qai rauta toka na 7 na kaloko e na mataka lailai ni siga vata tikoga o ya, era sa raica sara na lewe ni koro ni sa cowiri wavoki tiko e macawa e na nodra dela ni koro, e dua na waqavuka ni ?Air Fiji?.

?Levu na lomatarotaro e sa yacovi keimami na lewe ni koro se cava e cowiri taka tiko e macawa na waqavuka o ya ni se qai mataka lailai, ka vakasosataka na neimami vagagalu e na rogolevu ni kena i dini.

?Oi, rairai e vakatabaka tiko beka na ?Sovi Basin? ka tiko volekata na neimami koro na waqavuka o ya, baleta ni ra maroroi tiko kina na veimataqali manumanu kece e na noda vanua? e kaya.

Kuria ni dede ga vakalailai sa rogovaki mai e na walesi ni sa voca na i matai ni waqavuka ka vuka mai Nausori ki Nadi e na mataka vata tiko ga o ya.

E kaya o Seruitukana ni ratou tukutuku e na siteseni ni ovisa mai Nausori, ka tarogi tale mai vei iratou se ratou kila vakacava ni voca e ke ya e dua na waqavuka?

?E sega tikoga ni cegu na yaloi keimami na lewe ni koro e na nona vuka cowiri tiko ga e na dela ni neitou koro na i karua ni waqavuka.

?Keimami sa vakadeitaka e kea ni sega tale ni qai veitaba tiko na waqavuka ka cowiri tiko e cake, qo e sa vaqara sara tiko ga na i matai ni waqavuka ka biuti Nausori mai e na veimama ni 4 e na mataka ni siga oya,? e kaya.

Kuria na turaga yabaki 57 oqo ni uqe tiko ga na lomana ka vakadeitaka vua ni dua dina na leqa e sa yaco e na veidelana e wavolita tiko na nodratou koro.

Tomana e na nona kaya ni rauta toka na veimama ni 9 na kaloko e na mataka ni Vakarauwai o ya, sa talave na kabu e na kena sa qai curuma vinaka yani na matanisiga na nodratou koro, ka sa rarama vinaka sara mai.

?Na gauna talega oya e ra sa veitaratara kina e na walesi na waqavuka ka cowiri tiko e dela ni koro kei na rara ni waqavuka mai Nadi e na kena sa laurai ni dua na ka e taliva tiko e na delana o Mataicicia.

?Ni keimami se loma tarotaro tiko se cava e sa yaco, keimami sa raica ni rua na waqavuka vakatau va (helicopter) e rau sa tubu tale tu ga e macawa,? e kaya.

Kuria o Seruitukana ni sa qai kerei ki vei Ratu Lino Seruitukana ke rawa ni la?ki vakaraici mada na vanua e voca kina na waqavuka.

Tomana o Seruitukana ni lewa e sa qai vakatauca mai Vunivalu, sa i koya me ra lako cake, ia, kevaka e dua e se bula tiko me ra cakava mai e dua na i tavata, ka vakaleleci ira sobu mai kina ki nakoro.

Taumada na nodra gole na gonevuli e na vaqaqara, ka ra mani lesu koso mai ni ra a sotava e dua na tamani vuaka levu, ka ra veicicivi tale mai nakoro.

Gauna vata talega o ya e ra sa biuta kina na neitou koro e dua na i binibini cauravou levu mataivalu yava e na nodra sa sasaga cake ki na delana o Mataicicia.

E kaya o Seruitukana ni o rau na waqavuka vakatau va oqo e dua e sa ro toka e bati ni wai, na kena i karua e sa vakatubutubu wavokita tikoga e na delana o na Mataicicia me yadrava tiko na vanua ni voca.

Kuria o Seruitukana ni sa qai kerea o Paileti ni waqavuka ke rawa ni dua e vodo cake me la?ki yadrava tiko na vanua ni voca.

?Au sa mani bole sara ka sa qai luvata o Pailate na katuba ni waqavuka, vaqarai mai e dua na dali ka keitou biuta cake sara ki na delana o Mataicicia.

?Gauna keitou yaco yani kina ki kea, keitou lai vakacawiri tu mada e na loma ni tini na miniti e na neitou sarava tu mai macawa na vakaloloma ni i rairai ni waqavuka,? e kaya.

Tomana e na nona tukuna ni sa rairai vakaloloma dina na i rairai ni waqavuka e na nodratou sa vakaraica toka mai macawa, ia, kevaka me a tikica vakalailai na delana vatu o Mataicicia, ke ra a kabuwacara ka dui tautau na yago ni tamata, e dua na kena kalougata levu ni a lauta ga vakadodonu na delana, ka naulu vakadodonu sobu ki ra.

Kuria e na nona kaya ni ratou a gole cake tale e na dua na delana ka rauta toka ni 100 na mita na kedrau veiyawaki vata kei na vanua ni voca, ka rau la?ki samaka kei na dua na turaga e na nodratou koro me rawa ni ro kina na waqavuka vakatau va.

Tomana ni oti oya e sa qai vesu e dua na dali e na yava ni waqavuka, vesu sara e tolona, ka vakatukutukutaki sobu e na vanua ni voca.

?Cava tu na saravi ira na yaloyalo ni sotia ni Merika na ?SAS? e na noqu sa lili tu e na dali, ka vukataki au cake yani na waqavuka e na vanua ni voca.

?Na gauna talega oya e sa vaka tu na qasikaloaloa na levu ni tamata era sa sarasara tu yani e na neitou matasawa.

?O noqu daulomani e sa lomaleqa sara vakalevu e na nodra sa sarasara tu mai matasawa niu sa lili tu e na dali, ni sega mada ga ni bau dua na tereni me?u cakava, na yalo sara ga ni loloma kei na muri lewa e tukuna na neitou Vunivalu, au sa bolea kina na dredre, ka?u guilecava na veika e na qai yaco e muri.

?Au sa mani bolea talega kina baleta kevaka e dua tale e a lili e na siga o ya, au vakabauta ni na rawa tale ni yaco vua e dua na ka.

?Na gauna au sa lili kina sa tekivu cawiri na dali, sa vinaka ga ni sa bau matai sara ga vakavinaka na Pailate oya, ni gauna e sa malumu kina na kena cowiri na dali, sa qai tosoya yani vakamalua na waqavuka o Pailate.

?Gauna sa toso tiko kina na waqavuka, au sa vakatovolea na dali, ke sa cavuka ga o ya, sa vakamoce sara tiko ga vei tinadratou na gone kei iratou na luvequ.

Na gauna e sa yacova kina na vanua ni voca sa ririko o Pailate de tara na vatu na i vocevoce ni waqavuka, ka tukuna me keitou sa lesu tale.

Au sa qai sikinalataka yani vei iratou me ratou biuti au ga e na dua na tuvuka ni vunikau levu me?u mokota, ka me ratou lesu tale ki delana ka sa samaki oti koto.

Namaka na kena i kuri e na macawa mai qo.

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.