Vakarau tara na koronivuli e Nasau UNAISI RATUBALAVU | Monday, August 7, 2017

ERA sa marau na lewe ni tikina o Nasau mai Ra, ni sa na vakarau tara e dua tale na koronivuli ena loma ni yasana, vakadeitaka na i liuliu ni matabose ni yasana o Ratu Manoa Seru.

Vei ira na i tubutubu ena tikina oqo, e vuqa vei ira era dau vakauta mai na luvedra ki na veitaoni lelevu, baleta ni sega ni tara tu e dua na koronivuli ni vuli toro cake ena loma ni tikina se me voleka vei ira.

Vakadeitaka talega o Ratu Manoa, ni sa vica vata mai oqo na yabaki era kerea tiko ena matabose ni yasana na koronivuli me na tara, ia oqo e sa voleka sara me na saumi na nodra wawa voli mai ena dua na gauna balavu. E kaya o Ratu Manoa ni dau levu na leqa e tara na bula ni vuvale kei na bula ni kauwai ni ra sa veibiu tu na vuvale ena vuku ni vuli ka vei ira na gone.

Na tikina oqo e tiko sara ena loma ni vanua o Ra, ka vakaraitaka o Meli Tokalau na mata ni tikina o Nasau ni sa vakadeitaka na matanitu e $45,000 ena kena tara na koronivuli ena vuku ni tuvatuva vakailavo.

Ena tekivutaki na kena tara na valenivuli nodra na Fomu 3 e vakaraitaka o Tokalau.

Ena tekivutaki tiko na tara ni valenivuli mai na Fomu 3 me yacova sara na Fomu 6,  ka sa rawa tikoga vei ira na gonevuli mai na paraimiri me ra na semata tiko na nodra vuli ka ena koronivuli vou oqo.

E na gauna talega oqo e sa mai tu vakawawa na nodratou kerekere na tikina o Nakorotubu me na dua talega na koronivuli ni vuli toro cake ena sekeniri baleta ni ra se lewe lailai na gonevuli ena loma ni tikina.

Vakadeitaka na vakailesilesi ni Tabacakacaka ni Vuli na tikina oqo ena bose ni yasana ka vakayacori mai na yasana o Ra ena macawa sa oti.

Eratou sa vakadikeva oti na kerekere oqo na Tabacakacaka ni Vuli, e laurai kina ni lailai sara na gone era tiko ena taba ni bula mera vuli ena sekeniri ena tikina o Nakorotubu, ka laurai ni sega ni vakayacori na kerekere oqo.

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.