Na bibi ni sova ni vuli UNAISI RATUBALAVU | Monday, August 7, 2017

ENA macawa oqo e ra marautaka tiko kina na luveda era lewena tiko na sova ni vuli na bibi ni veiqaravi vakavuli oqo ena noda bula.

 Ena nona kila na matanitu kei na Tabacakacaka ni Vuli na bibi ni nodra tuberi kei na nodra vakavulici vinaka mai na sova ni vuli na luveda.

Oya na vuna  e sa vakarautaki kina e dua na macawa me dau vakayacori kina na soqo, kei na porokaramu tale eso me vakabibitaki kina na bibi ni vuli vei ira na luveda yabaki 4 kei na 5 na nodra tuberi mai ka vakarautaki ni bera ni ra laki Kalasi Dua.

 E na nodra vosa ni veivakasalataki na Tabacakacaka ni Vuli ena macawa oqo, vakabibitaki tiko na nomuni veitokoni na i tubutubu, kei ira na tubuni gone ena nomuni gole tiko ki koronivuli ka tiki ni tuvatuva ni qasenivuli ena kena marautaki na macawa ni sova ni vuli ena macawa oqo.

 E na veivakayaloqaqataki na nomuni laki tiko na i tubutubu ena vuku ni nodra tokoni tiko na luveda.

 E laki vulagi dokai talega ena soqo vata oqo na Minisita ni Marama kei na Gone o Mereseini Vuniwaqa ka vakayacori mai Nabitu e Tailevu ena siga Moniti.

 Vakadeitaka tiko na nona vosa o Vuniwaqa vei ira na lewenivanua era tiko rawa ena soqo oqo na bibi ni nodra laki tuberi ena sova ni vuli na luveda.

E vakaraitaka talega ni dodonu me da na veisautaka na noda rai na i tubutubu, baleta eso era nanuma me ra qai laki vuli ga na gone ni ra sa yacova yani na yabaki 6 me ra laki Kalasi Dua.

 Ia e tukuna tiko o Vuniwaqa ni dua na taba ni vuli dredre vei ira na luveda e ka bibi kina me ra tuberi mai vakavinaka na gone ena taba ni bula oqo, oya mai na yabaki 4 kei na yabaki 5.

E vakabibitaka o Vuniwaqa ni ra na tuberi ga mai vakavinaka ena sova ni vuli, ena rawarawa talega vei ira na gone na nodra qarava na nodra lesoni e na  i vakatagedegede ni paraimiri.

 Era kila vinaka mai kina na veika bibi ena fika kei na mata ni vola ena i vakatagedegede ni sova ni vuli.

Ena macawa talega oqo, kei na vula oqo o Okosita e dua na vula osooso baleta ni sa roro tale mai na sereki ni vuli ni mai cava na i karua ni wasewase ni vuli.

 Na vula talega oqo e dau qaravi kina na Koniferedi se na Bose ko Viti ena loma ni Lotu Wesele.

Na macawa mai oqo e na tekivutaki kina na Adi Senitoa, kei na kena mai vakacavari tiko na sotasota ni qito rakavi vei ira na luveda, kei na netball vei ira na goneyalewa.

E da sa veivakananumi tikoga me na qarauni tiko na bula, ka me na qaravi vinaka tiko na bula ni vuvale ni bera ni da goleva tale na veisoqo tale e so.  Vei ira na luveda, mera na qarauni vinaka ka me da na kila tiko na i tubutubu na vanua era tiko kina, kei na nodra i lawalawa.

 Me da na kila talega na gauna cava era na lesu mai kina e vale.

 Me da na veitalanoa vinaka mai vale, ni bera ni da qarava tale yani eso tale na ogaoga ena taudaku ni noda vuvale.

 Esa levu talega na vakacalaka ena gaunisala, baleta ni a levu sara na veitosoyaki e vakayacori tu ena veisiga vakabibi ena mua ni macawa.

 Me da na vakamuria vinaka na lawa ni gaunisala, ka kua soti na draiva vakatotolo vei kemuni na draiva ni tolili.

 E na rua na macawa ni sereki, e nuitaki ni ra na marautaka na noda i solisoli na nodra vakacagicagi ka dodonu talega me na tiko na gauna mera na raica lesuva toka na nodra i vola ni vuli, baleta ni wasewase ni vuli dredre ka vakayacori kina na veitarogi lelevu.

 Esa nuitaki talega ni da na vakabibitaka talega na gauna ni noda dabe vata vakavuvale ka me ra tuberi tiko na lewe ni vuvale ena veika e yaga ka tarai cake kina na noda bula kei na noda i tikotiko kei na vanua.

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.