Vakavakarau vinaka Talatala ILIESA NAIVALU | Monday, September 11, 2017

Update: 11:08AM EDA na tomana tale tiko na nodra tataunaki na noda cauravou kei na goneyalewa ena veika bibi e dodonu mera vakarautaki ira kina ni bera ni ra vakawati. Sa noda itavi talega na itubutubu kei na qase dauveisusu, na italatala, ivakatawa kei kemuni kece na Qase ni Lotu mo ni veivuke ena nodra vakarautaki vakavinaka na luveda.

Ena noda gauna ni cauravou kei na goneyalewa e vakadinadinataki ni dua na i wase levu ni gauna eda vakayalia kina noda vakasamataka se o cei sara mada e ganita me mai watida. 

E levu na vatavatairalago e da tuvatuva kina ni o koya me mai watida e dodonu me vaka oqo se vaka oya. 

E na levu ni noda rui osooso ena noda digidigi se ogaoga ena vaqaqara, sa la�ki lailai wale na gauna e da vakarautaki keda kina me da bau daumaka toka me rawa kina ni da veiganiti vakavinaka kei koya eda digitaka. 

Na matada sa viritaki tiko ga vakayawa vei koya e lako mai, ka sega ni da raici keda se da sa vakaevei toka. 

E dua na tiki ni noda bula vakatamata, aya me da `vakadeuca na i tuvaki ni dua na cauravou se goneyalewa me tautauvata kei na ka eda vinakata, ia e lailai sara na gauna me da vakaraici keda ka vakarautaki keda tale ga me rawa ni sota kina noda digidigi kei na nanamaki mai nei koya eda digitaka.

Ena Lotu Vakarisito, sa dua na ka bibi sa i koya na gauna ni vakavakarau ki na bula vakawati. 

E vuqa na ka e dodonu me ia kina na vakavakarau, ia e seva ni lewe vuqa sara na cauravou kei na goneyalewa e sega sara ni ra bau curuma e dua na bula ni vakavakarau.

Ia ni sa dua na cauravou se goneyalewa e vakarautaki koya ena yalomatua, na totoka ni bula vakayalo, na itovo vinaka kei na kena tiko e so na iyau me tekivu kina na i lakolako ki na bula vakawati, sa rawa ni da kaya ni sa ganita vakavinaka me sa vakawati.

Me vaka ni na taura na gauna taucoko ni bula na vakawati, sa ka bibi kina me vakabibitaki ki na bula ni dua na cauravou kei na goneyalewa na vuku kei na yalomatua. 

Sa toso cake tiko ga na levu ni vuli vinaka kei na kila-ka vei ira na noda itabagone. 

Ia sa vaka e davo vata toka kei na druka ni vakatulewa. 

Na ka ga e kunei votu ni yalowaitaki na vakawati; e yali na mataqali vakatulewa vinaka e dau vakabasikataki ni tiko na vuku kei na yalomatua. 

Eda sa na muria tale mada e so na idusidusi ni vakavakarau ki na vakawati me vaka e a vola na i Vunivola Levu Digitaki ni Lotu Wesele kei Rotuma, ko nai Talatala Ili Vunisuwai. 

E vakabibitaka o Nai Talatala Ili Vunisuwai ni gauna eda sa curuma kina na katuba ni vakawati, eda sa curuma tiko nai tavi ni veiliutaki. Kevaka e sega ni yalomatua o koya e veiliutaki, sa itekitekivu ni kena bucini e dua na kawatamata yalowai ka na i kuri ni leqa ni bula vakalewenivanua e na veigauna mai muri. 

E kaya tale ni veiliutaki e rua na na kenai yau levu, matai na vuku yalomatua ka kena i karua sa ikoya na loloma. 

Na ka e rua oqo e rau i yau levu ni bula, ia na yalowai sa meca levu ni veiliutaki vakavuvale. 

E kaya vakakina na Jope 28:18, �Ena sega ni tautauvata kei na lase damudamu se mataniciva ni sa i yau talei na vuku ka i yau lailai na rupi.� 

E tomana o Talatala Ili ena nona kaya, ni kevaka eda veiliutaki e na vuvale e na yalowai, eda sa na susuga tale ga na tamata yalowai ka sa na qai toso tiko ga na kawa ni tamata yalowai. 

E rogo bibi toka na i tautau ni vosa oya, ia e na yaga me raici vata kei na veika e vinakati me vakabibitaki tiko. 

E kaya vakakina na Vosa Vakaibalebale 3:13-15, �Sa kalougata na tamata sa kunea na vuku kei na tamata sa rawata na yalomatua. 

Ni sa vinaka na veivoli kina ka ca na veivoli ena siliva. 

A kena tubu tale ga sa vinaka ka ca na kena tubu na koula dina. Sa i yau levu ko koya ka ca na rupi. 

Ia na ka kecega sa domona ko koya sa sega ni yaga me vakatauvatani kaya.�

Na vuku vakacava e tukuna tiko oqo na i Vola Tabu? Oqo na vuku vakayalo ka dau vakatokai tale ga me yalomatua; sa i koya na kila e tu vua e dua na tamata me rawa ni wasea kina na vinaka mai na ca, na dodonu mai na cala kei na dina mai na lasu. 

Oqori na vuku e gadrevi me rawa ni vakatulewa vakavinaka kina e dua na tamata. 

E vuku vakayalo kai solisoli ni Kalou vua na tamata e qaravi Koya. 

Vei kemuni na cauravou kei na goneyalewa, e va na sala e dusia o Nai Talatala Vunisuwai ka rawa ni ko ni taukena kina na vuku kei na yalomatua: 

Matai, me da kila ka rerevaka na Kalou, se meda veikilai vinaka vakayalo kei na Kalou. 

Ni da veikilai kei na Kalou eda na qai rawata na vuku dina ena noda biuta na ca ka muria na dodonu, na dina kei na savasava. Na ca sa dau vakayalowaitaka na tamata. 

Ni ko biuta na Kalou e na biuti iko tale ga na vuku ka ni vuku e tiko ga kei na Kalou.

E dua na ka au sa dau vakabibitaka oti yani vakavuqa ni sa dodonu ki na cauravou kei na goneyalewa taucoko era via vakawati me ra vakadeitaka rawa mada na nodra sa vakabulai vakayalo, aya, na nodra soli bula vua na Kalou ka ciqomi Jisu Karisito me Tui ka Turaga ni nodra bula. 

Eda duavata kina kei nai Talatala Ili Vunisuwai ena nona kaya ni kevaka ko sa soli iko dina sara vei Jisu Karisito, ko sa rawata e yalomu na yalo ni Kalou ka sai koya oqori na yalo e dau vakavukui keda ka kauta mai vei keda na yalomatua. 

Sa kena i balebale oya ni sa dua na yavu bibi ni noda vakarautaki keda ki na bula vakavuvale sa i koya na noda rawata taumada na noda vakabulai vakayalo Vua na Kalou. 

Ni ko sa vakabulai ga vakayalo, sa vakadeitaka ni sa na vakabulai tale ga na nomu vuvale.

E kaya kina na Jope 28:28, �Raica na rerevaka na Turaga sa i koya na vuku kei na biuta na ca sa i koya na yalomatua.� 

Na V/vakaibalebale 9:10 e kaya,�A rerevaki Jiova sa vu ni vuku kei na kilai Koya na Le Dua Yalosavasava sa ka ni veivakayalomatuataki.�

Na rerevaka na Kalou e kena i balebale na biuta na ca. 

E sega ni via kabita se dau qitotaka na ca. Na ca e meca ni Kalou ka dau yalowai kina na tamata. Kaya tale na Vosa Vakaibalebale 8:13, �Oqo na rerevaki Jiova, me cata na ka ca, na qaciqacia kei na viavialevu, kei na sala ca kei na gusu dau lasu au sa cata.� 

Oqo na veiyavu e dodonu me ra vakayavutaka kina nodra vakarau cavuikalawa na cauravou kei na goneyalewa ki na buturara ni bula vakawati ka ni na vakadeitaki ira ka maroroi ira mai na veileqa lelevu ka dau tinia koso na talei ni vakawati.

Ena qai kuri tale yani

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.