Qito vinaka VILIAME ODRO | Monday, September 11, 2017

Update: 11:50AM SA dodonu me ratou vakavinakataka cake na i vakarau ni nodratou vakasama na lewe ni timi ni Fiji Airways Drua kevaka e ratou vinakata me ratou qaqa e na siga Vakaraubuka ni macawa oqo.

Oqori na veika e cauraka toka mai o Usaia Korovunilagi na dau ni veivakatavulici ni timi ni Lautoka e na yabaki oqo.

E kaya o Korovunilagi ni sa vo sara ga e so na ka lalai ka nuitaka o koya ni na raica tiko o Koli Sewabu na malumalumu e tiko vei iratou na cauravou e na i matai ni nodratou qito ka na rawa ni vakavinakataka cake e na macawa oqo.

Tomana o Korovunilagi ni so na gone vinaka era tiko e na timi ni Fiji Airways Drua, ia, sa vo sara ga e vica na ka lalai me ra vakavinakataka.

E dua me terenitaki na nodra vakasama ni gauna e sa kaukauwa kina na veisamuraki e loma ni rara, me kakua sara ni yaco mai vei iratou na yalo totolo ka vakavuna na nodratou ciqoma na tiki ni veva dromodromo.

�Dodonu me ratou vakavinakataka cake na nodratou i vakarau ni qito, ka me kakua ni kau tiko yani na i vakarau ni qito ka dau vakayacori tu e na noda vanua.

�O ya e sa vanua levu ka dodonu me ratou vakavinakataka na nodratou i vakarau ni qito me rawa ni kua kina na tiki ni veva dromodromo,� e kaya.

Kuria e na nona tukuna ni sa vo me ratou raica vinaka na nodratou veicumu (scrum) me ratou kakua ni biliraki tiko i muri e na veigauna ni qito.

E kaya o Korovunilagi ni sa vinaka sara ga na nodratou qito na cauravou ka da matalau na dau veitokoni na sarava na mataqali qito e ratou vakaraitaka na cauravou.

�Raica mada na nodratou qito vata mai e na i karua ni veimama, au vakabauta ke me vakatiko oya na nodratou qito e na i matai ni veimama ke a dua dina na i rogo.

�Sa totoka sara ga vakaoti na nodratou vakamalolo e loma ni rara e na i karua ni veimama ka vakavuna me veivolekati na kai,� e kaya.

Tomana ni qito e na macawa oqo e dodonu me da vakanamata kina, ka me da veimasulaki vei iratou na cauravou me rawa ni vukici na uto ni oti uvuci na sici e na i ka otioti ni miniti.

E dina ni o ira na qito tiko mai vavalagi e ra vakarautaki vakavinaka na nodra vanua ni tereni, ka vakakina na kedra i sau, ia, na ka ga e duidui kina ni o ira na noda cauravou e tiko vei ira na yalo ni valataka na noda vanua.

Sa nuitaka tu o Korovunilagi ni na dua na qito vinaka e ratou na vakaraitaka na Drua e na macawa oqo, ka sa vakanuinui tu ni na laveti na rara mai Ositerelia.

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.