Keli koula e Vatukoula VILIAME Gavoka | Monday, October 2, 2017

O ira na cakacaka ena qara ni koula mai Vatukoula. Veitaba: VAKARAUTAKI
O ira na cakacaka ena qara ni koula mai Vatukoula. Veitaba: VAKARAUTAKI

ENA noda veiwasei ena macawa oqo me baleta na noda vakailavotaki na kawa iTaukei, au gadreva me?u tekivutaka ena noqu vakavinavinaka kivei iratou na wekadatou e Tavua, ena nodratou cauraka mai na veika e baleta na keli koula e Vatukoula.

Oqo e a ulutaga liu ena Fiji Times ena Vakarauwai ena i ka ruasagavulu ka tolu ni Seviteba (23.9.17).

Eratou cauraka tiko na wekadatou e Tavua ena kena sega vakadua ni bau dua na nodratou i wasewase ena koula kece e keli tiko e Vatukoula, dina ga ni a nodratou na qele e vakayacori kina na keli koula. 

Oqo e dau vakatokai me ?royalty?, ka dodonu me tuvatuvakataki me nodratou na itaukei ni qele. 

E sa sivia oqo e walusagavulu (80) na yabaki na keli koula e Vatukoula, ia, me vaka au cauraka e Palimedi, e nodra ga na kena vinaka o ira mai Ositerelia, ka sega na itaukei ni yau bula e Viti.

E vinaka me vure cake mai na veitalanoa vakaoqo, me vukei keda ena kena tuvatuvani na keli yaubula e loma ni qele e daidai kei na veigauna mai muri. Me vaka eda veiwasei kina ena vica na macawa sa oti, e rua tiko na mataqali yaubula e rawati ena loma ni qele; oya o ira na vatu talei me vakataka na koula; vata kei ira na kedra era vakatokai me ?low value minerals & materials? se LVMM, ka ra wili kina na qereqere, na veivatu kaukauwa eso era qaqi, kei na nuku.

O rau ruarua oqo e rau vurevure ni lavo vakaitamera sara, ia, me vaka eratou cauraka mai e Tavua, e takiveiyaga vei keda na itaukei ni qele e Viti ena vuqa sara na vanua era keli tiko kina.

Au sa cauraka tiko e Palimedi mera kau mai na kena dau ena veivakasalataki ena tikina oqo. Era tu na ?economists? era buta vinaka ena veika baleta na keli yaubula ka ra rawa ni tuberi keda ena veitalanoa me baleti na i tuavtuva cava e uasivi taudua; era tu na ?social scientist? era rawa ni vakasalataki keda ena kena tatara ena noda bula na keli i yaubula e loma ni qele, kei ira tale eso na kena dau.

E a veitauri vei keitou e Palimedi e dua na wekada na Loma e Suva ka veiqaravi tu ena veiyasai vuravura me vakataki Saudi Arabia ena keli waiwai, kei na veivanua tale eso ka yaco kina na keli yau. 

Au a tarogi koya se e vakaevei tiko e Viti ena kena vakatorocaketaki na itaukei ni yaubula; e a sega ni sauma sara vakavinaka na wekadatou oqo, ka vaka ga e kaya ni veilecataki tiko na noda i tuvatuva na itaukei ni yau bula e Viti. 

Au siqema rawa ni vosa tiko oqo ena kena dau tiko na duidui ena keda maliwa ka sega kina ni dau vakadavori vakavinaka na veiwekani kei ira na veikabani eso. 

Oqo eda kila vakavinaka ni dau tiko eso ena loma ni mataqali se tokatoka ka ra kaya me sa nodra kecega; ka dau vakavuna na leqa.

Ia, oya meda qai tovolea meda walia, ka me liu mada ga na kena tuvani vakamatau na cava e noda na itaukei ni yaubula. Me vaka au sa dau vakabibitaka vakavuqa, na veibisinisi kece e mai dabe ena nodatou tikina, me dua na kena i wase ni lavo e rawa me nona na itaukei ni qele (percentage of gross receipts se royalty). 

Ena dabe ni Palimedi ka se qai vakayacori ga oqo, eratou baci cauraka mai na kequ i sa ena matanitu ni sa ia tiko na veivakacakacakataki eso ka dodonu meda marau kina. 

E sega, e sega ni o koya kece oya, e dodonu me dua mada ga na nona i wasewase ni taukei ni yaubula, qai kena i kuri na veika tale eso.

Eratou na duavata kei au na wekadatou e Tavua ena tikina oqo, ka ni a vica vei ira era cakacaka ena kabani ni keli koula, ia, e i lavo lailai sara oya. 

Na kena eratou calata oya na i lavo vakaitamera vakaroyalty. Meda kakua ni galu ka cauraka mai na veika eda raica ni sega ni veiganiti vakailavo. 

Kevaka e dua e taya nomu kau, ka lailai na i lavo e sauma tiko, cauraka mai; kevaka e dua e vakayagataka tiko nomu i qoliqoli ena caka bisinisi ka sega ni dolei na mataqali ena dua na ka, cauraka mai; kevaka e qaqi vatu tiko ena nomu tikina ka sega ni veidonui na veika e sauma tiko, cauraka mai.

Meda vuli mai vei ira na wekada na dauteidovu, era sega vakadua ni galu ena dua na gauna kevaka era raica e dua na ka e cala vei ira. 

Ena sega vakadua ni dua na matanitu me vakaweleweletaka na nodra kudru na dau tei dovu, ka vu oqo ena nodra sega ni suka i muri. 

E vakaraitaka na jemeni vou ni kabana ni suka (FSC), ni sa rauta e va na drau na milioni na dola ($400,000,000) era vukei kina na dautei dovu ena loma ni tini na yabaki sa oti.

Kivei keda na veiwekani, meda cauraka mai. 

Keimami sa tu oqo na wekamuni keimami na biuta na veika kece e baleti keda ena buturara cecere ni veivosaki, ka me yaco kina na veisau ena noda vakailavotaki na kawa iTaukei.

Au vakananumi keda tale ena nona vakadidike na Prime Minister e Singapore baleta na leqa ni vuaviri e Viti, ka kaya ni na vukei Viti sara vakalevu kevaka eda vakailavotaki na kawa iTaukei. 

Oqo au vakabauta talega o au, ia, meda vakataki iratou na wekada e Tavua, meda cauraka mai, me vakauqeti keda ena duavata ni sasaga ni veivakaiyautaki.

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.