Cara sala ki Lomainasau VILIAME ODRO | Monday, October 9, 2017

E DUA na siga guiguilecavi dredre ki na koro vakaturaga o Lomainasau, Tokatoka e Tailevu na Vakarauwai sa oti, ni oti na nodratou cara sala yani na vuvale ni dua na turaga o Jimilai Ratu.

Na kena i talanoa na turaga oqo, o Jimilai , e a gole ki Vatulele, Wailevu e Cakaudrove ena 1800.

?Esa laki vakawati mai keya, vei Temalesi Curuwale ena mataqali o Sari.

 ? Esa laki vakawati ka kacikaci ni cagi talega ena nona koro ni dodomo na turaga oqo.? vakaraitaka e dua na makubuna o Iliesa Matakubou.

Ia, ni ra gole yani e rauta ni 100 vakacaca na nona kawa o Jimilai ka ratou kawa ni sauturaga ena mataqali o Naivitokalau mai Lomainasau e Tailevu, e dua na ka na marau kei na nodra veimarautaki ni ra sa mai  sota vakaveiwekani ni sa oti oqo e 200  vakacaca na yabaki.

E rauta ni tolu na i taba tamata kei na i ka va ni taba tamata era a gole yani ena siga ni cara sala oqo, ka  lako vata talega kei na soqo ni  kau matanigone.

Vakadeitaka mai ko Matakubou na gusunivosa ni vuvale mai vei Jimilai ni ra a veivosaki makawa tiko mai na nodratou gone ena vuku ni kena lesuvi tale na vanua e gole mai kina qo na tukadratou e Lomainasau.

?Esa dua na siga taleitaki ka sebera ni laurai vakadua me dua na cara sala kei na soqo me caka e Lomainasau me vaka oya na kena i rairai, ka sa vakavinavinakataki na Kalou ena nona vakarautaka ka vunitaka tu na siga oya, ka me vaka talega oya na kena i rairai.

Eratou a tadu yani na vuvale oqo, ka ratou cabora rawa na nodratou isevusevu ena nodratou loma ni vale ena loma ni mataqali o Naivitokalau ni bera ni qai ra laki sevusevu vua na Tui Lomainasau, o Ratu Isoa Tikoca kei na vanua.

Ni oti oya, era sa qai mai cakava na nodra boka kei na nodratou sa vakaisulu talega mai o rau na makubui Jimilai Ratu, ka rau liutaka mai na kena kau mai vakadua na matadra na ulumatua ni veivuvale erau sa mai vakawa kina o Jimilai kei Temalesi.

E dua na i yaloyalo ni bula e veivakaturagataki kei na yalo ni veiciqomi e saravi toka ena loma ni koro o Lomainasau ena sigalevu ni siga Vakarauwai sa oti.

E rogo toka na domo ni tagi ka vakilai talega na yalo ni loloma ni vuvale kei na yalo ni veidokai vakaturaga ena soqo ena siga oya, ka vakayacori ena loma ni valenisoqo e Lomainasau.

E oso drigi na loma ni vale vakoro ena kena vakayacori tiko na soqo lagilagi qo.

Ena gauna e ciqoma kina na turaga na Tui Lomainasau o Ratu Isoa Tikoca na nodratou kamunaga ni boka na vuvale maivei Jimilai Ratu, e kaya vakaoqo ne:

?Oqo sa nomuni koro, ko ni sa ciqomi tu, ka nomuni vale kece na veivale kece e Lomainasau.

?Ni gole mai, ni mai tiko vakacegu, na kemuni, na qele kei na koro oqo e sa ciqomi kemuni tiko ena veigauna kece,? e kaya o Ratu Isoa.

Na nodratou mai caramaka tale na nodratou sala na vuvale nei Jimilai Ratu, e sa dolava kina e dua na mata ni katuba vou ni veiwekani vei ira na i solisoli kei na veiwekani era mai sota vata ena siga oya.

Ka sa veisureti talega na koro o Lomainasau ki na vuvale ena vuku ni soqo na Lomainasau Day ena macawa mai oqo.

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.