Sivita na takete o Soloira VILIAME ODRO | Monday, October 9, 2017

E ratou sa liu mai oqori na Youth Brass Band, ka ra veimuri mai na vuli oti e na Soloira Secondary School mai na koro ko Serea, Naitasiri e na Vakarauwai sa oti.                         Veitaba: VILIAME ODRO
E ratou sa liu mai oqori na Youth Brass Band, ka ra veimuri mai na vuli oti e na Soloira Secondary School mai na koro ko Serea, Naitasiri e na Vakarauwai sa oti. Veitaba: VILIAME ODRO

NI QAI kida cake mai na mataka lailai ni siga Vakarauwai e na macawa sa oti e ra sa ukutaki oti tu na vei vakatunuloa e na rara ni koronivuli mai na koro ko Serea, na Soloira District School, ka ra sa tekivu yacoyaco tale tikoga yani na vulagi dokai.

E rairai totoka na loma ni bai ni koronivuli oqo ka lako vata toka na boi sareguregu ni kakana e na nodra vakasaqa toka na turaga kei na marama ni Serea e na mataka o ya.

Ni qai rauta toka na 10 na kaloko e ra sa gole kece na turaga kei na marama ki na sitoa ka toka ga e yasa ni koro me ra la?ki voleni mai kina ka ratou liutaka mai na Youth Brass Band.

Sa totoka dina ka vakaciriloloma ni ra sa liu tu mai na matabani, ka ra qai veimuri mai na turaga kei na marama i taba qase duadua me yacovi ira sara na se vuli tiko e na gauna oqo.

E caka na vakasausau ka so era luluvu na yalodra e na nodra vakasamataka lesu na gauna dede era bula, susu, ka vuli mai kina e na Soloira District School, ka ra sa qai mai veisotaraki tale e na siga o ya.

Na gauna era sa yaco mai kina e na nodra dui bolabola, sa qai mai tekivutaki vakalotu na soqo mai vei Talatala ni Tabacakacaka o Waimaro, Talatala Mosese Koroimata ni bera ni qai vakarewa na kuila ni noda vanua.

Oti o ya era sa qai kidavaki na lewe ni vanua mai vua na jeameni ni koronivuli ni bera ni qai tayabetaki cake mai e rua na i vutu senikau, ka ratou vakatagitaka toka vakamalua na sere ni lotu na ?Mai seretaki ira ga? o ratou na matabani me ra nanumi kina na luvei Soloira era sa gole yani ki na vanua e da na qai muria kece yani na vo ni bula.

Oti o ya sa qai mai vakacabora e dua na masu o Talatala Iliesa Momoivalu mai Waya e na yatu Yasawa.

E sa qai musuki na keke ni bera ni qai mai dua yani na vosa ni vakavinavinaka levu mai vua na qasenivuli liu o Alipate Rokobiau.

Taumada na nona vakamalemaleka cecekia vua na Kalou Bula na Tamada e na kena soli na draki ka vakakina na vakasama me bucini, ka vakamatanataki kina na soqo e na Vakarauwai.

?Au vakamalemaleka vakalevu kivei ira na luvei Soloira e ra vakaitikotiko e Viti, ka vakakina o ira na dodoliga mai valagi e na soqo e na siga edai.

?E warai na ka me dolei kina na nomuni yalomaleka e na i solisoli levu o ni dodoliga mai kina nikua,? tukuna o Rokobiau.

Kuria ni ratou drukataka na komiti ni nodratou takete e na siga o ya e $41,000 me tara kina e dua na vale ni qasenivuli vou, ka vakakina na kena tauyavutaki na mona livaliva (computer), me ra vulica na kalasi 1 ka yaco sara yani vei ira na kalasi 8.

Ia, na gauna e sa oti kina na soli, e ra a qai kumuna rawa e $44,000 ka sa vakavinavinaka sara ga kina vakaitamera o Rokobiau vei ira kece na tiko e na siga ko ya.

E kaya o Rokobiau ni a matai e na veisisivi soli e dua na turaga ni Idia o James Mahendra Kumari ka vakasitoa tikoga e yasa ni koro, ka solia rawa e $1000.

A i karua e na veisisivi soli o Arieta Robiu ka katolu o Alumita Vakarusalawe.

O Kumari e rau na gade tiko kei na nona lewe ni vale ka la?ki siga tolu ki na dua na otela e na yatu Malolo.

?E rau na vakavodoki sara ga mai nodrau mata ni vale, sega ni rau sauma e dua na ka me yacova na nodrau mai vakasoburi tale e na nodrau mata ni vale.

?O Arieta e na gade siga dua ki na vei otela e na yatu mamanuca, ka vakakina o Alumita, ia, e rau na vakavodoki talega mai na nodrau dui mata ni vale, ka la?ki vakasoburi lesu tale kina.

?Au vakamalemaleka sara vakalevu ki vei Elenoa Nimacere na manidia ni Awesome Adventures ka kena dau, ni waqa dau veivakaleleci ka ratou taukena na South Seas Cruise, e na nodratou vakarautaka ka vakailavotaka na i cocovi e tolu oqo.

Ni qai dre ko Malolo e na yakavi ni Vakarauwai, sa cabe kina e dua na Siga Vou ka na i vola tukutuku tu ni koro ko Serea e na dua na gauna balavu.

Sa nuitaka tu o Rokobiau ni ratou sa na vakayagataka sara vakavinaka na i lavo ka sa rawati e na siga o ya o iratou na komiti ni koronivuli, me rawa ni ra kila tiko na gole yani e na soli ni nodratou tatadra e sega ni balolo wale tu ga ni vakanananu, ka ni sa vakasucumi ka me cakacakataki sara yani na i lavo levu era sa rawata e na siga Vakarauwai.

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.