Mai Drevekai ki Nakauvadra Viliame Ravai | Monday, November 13, 2017

ESA koto oqo era nai kuri ni tukutuku nei Peni Tabua Tamanivalu na turaga ni Naloto ka veibulagoci tiko vei keda ena veimacawa, ni wiliwili sara yani.

E vakaraitaka o Peni Tabua Tamanivalua ni sa tu ga na Yavu ni Vakavulewa levu ka dodonu me da muria na tamata sai koya na Yavu ni Vakavulewa ni Kalou ka a muria voli mai na tubuda o Eparama, tubuda o Aisake kei Isimeli ka vaka kina o Jekope ka dodonu talega me da muria ko i keda ena gauna qo.

?Na lawa levu ga qo e mai muria o Mosese ka ra taurivaka na Isireli ka ra bulibuli lawa talega mai kina na vei matanitu e vuravura ka vaka kina vei keda e Viti,? e kaya o Tabua.

E tomana o Tabua na lawa kece qo e nona na Kalou ka solia mai me da mai muria vinaka ka vakabauta o koya ni na sega sara ni dua na leqa ke da vakamuria tale na lawa qo ka soli taumada vei ira na noda qase.

?E sa levu na veiveisau ni lawa sa dau vakaturi e na gauna e veiliutaki kina e dua na matanitu esa qaqa mai e na veidigidigi ena veivanua eso,? e kaya o Tabua.

Ia, e via vakananumi keda ga o Tabua ni tu vinaka sara tu ga na lawa levu ni Kalou ka da digovi vinaka kina o i keda na tamata e na gauna qo ka dodonu me da muria ka na sega ni rawa ni veicoqacoqa ni sa ra vakamuria oti mai na noda qase ka ra bula mai kina ni veilomani, veirogorogoci, solesolevaki, veivakaturagataki, veinanumi ka sega na veikalawaci me vaka eda sa raica tu ena gauna qo e na noda vanua.

E kaya o Tabua e na lawa ka sa vakadeitaki me lawa ni matanitu o Viti e na yabaki 2013 ka wili tiko kina na galala ni sokalou, rai vakayalo kei na vakabauta e vakamatatataki tu kina na tamata yadua e tu vua na dodonu ni galala ni sokalou, rai vakayalo kei na vakabauta.

Na tamata yadua e tu vua na dodonu, kevaka o koya taudua se lewe ni i soqosoqo me matanataka na nodra vakabauta e matana levu se sokalou e tawa raici, rokova, matanataka, se vakatavulica.

E kuria o Tabua e na lawa tikoga ni matanitu o Viti ka sa mai vakadeitaki ni tamata yadua e tu vua na dodonu me kua ni vakasaurarataki me cakava na i vakarau e veicoqacoqa kei na nona sokalou se vakabauta se bubului, se me bubului ena i vakarau, e veicoqacoqa kei na nona qaravi Kalou se vakabauta; se lavaka e dua na tamata me vakaraitaka na vakabauta e sega ni nona vakabauta.

Na veisoqosoqo lotu se matavakabauta, kei na veisoqosoqo vakavanua se kawatamata, e tu vei ira na dodonu mera tauyavutaka, qarava ka cicivaka na nodra koronivuli, kevaka mada ga e sega na veivuke vakailavo mai na Matanitu, me vakadeitaka tiko ga na koronivuli na i vakatagedegede e virikotori ena lawa.

E kaya o Tabua ni vakayagataki ni dodonu ena i soqosoqo lotu se matavakabauta e tu vei ira na dodonu mera vakavulici na vuli ni lotu me tiki ni veivakavulici, kevaka mada ga e sega na veivuke vakailavo mai na Matanitu ena vakavulici ni vuli ni lotu.

Ke dua e vuli, e tu nona dodonu me kua ni vakavulici ena vuli ni lotu, vakaitavi se tiko ena sokalou e sega ni salavata kei na nona vakabauta se sega ni tiko ena dua na matavakabauta.

?Ia, ena vakatautaki ena nona veivakadonui, se kevaka e gone, me vakadonuya na nona i tubutubu se dauniveisusu vakalawa,? e kaya o Tabua.

Na dodonu kei na galala e virikotori ena tikina qo, e rawa ni yalani vakalawa, ia na vakayacori ga ena gauna e gadrevi kina me yalani me taqomaki na dodonu kei na galala ni tamata tale e so, se ena taqomaki ni bula ni lewenivanua, i vakarau vinaka ni tamata, se na tikobulabula ni tamata, se na tarovi ni yavavala ni lewenivanua.

E kaya o Tabua ni sa dua na ka na kena vakayagataki tiko na dodonu ni tamata yadua ka sa vorolaka sara ga na yavu ni vakavulewa ni Kalou.

Na Kalou esa solia oti tu na nona lawa ka dodonu me da na muria tiko e na gauna qo ka da sa vakanamata kece kina me da rawa ni vinaka e na noda vakamuria na lawa ni Kalou.

?Na noda qarava na noda Kalou me ka ni yalo vinaka ka me da marautaka talega ka me kua ni ka ni veivakaukauwataki,? e kaya o Tabua.

E tomana o Tabua ni sa matata tu ni Kalou e vinakata me da na muria ga na nona lawa ka me rawa ni da sotava tiko kina na vakacegu, na nona veiliutaki ka me rawa ni kua ni sotavi keda kina na ca, meca, tauvi mate ka rawa ni da lako tiko vakadodonu ka bulataka tiko na bula ni loloma.

?Ni dua ga na tamata sa lewalewai koya tu ga ka sega ni via lewena e dua na mata vakabauta se dua na lotu sa basika saraga vua na yalo ni ca ke sega ni vakararavi vua na Kalou,? e kaya o Tabua.

?Ni dua ga e sega ni vakamuria na lawa ni Kalou esa na muria na i naki ni tevoro se o Setani,? e kaya.

E kaya o Tabua ni vinaka cake vei keda na kawa i Taukei me da sa na dei tikoga ena noda i tovo kei na i vakarau ni bula ka ra dau kilai tani kina na noda qase ena nodra dela ni gauna.

Ena qai tomani tale yani.

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.