Sasaga na Bati UNAISI RATUBALAVU | Monday, November 13, 2017

EDA marau ka cibi na lewei Viti ena qaqa eratou sa mai rawata na Vodafone Fiji Bati ena bogi ni Siga Tabu sa oti.

E levu sara na cavuisausau eratou mai rawata kina na noda mata timi, vaka talega vei Jarryd Hayne.

Na kai eratou binia vei Wales ena 72- 6 e dua na kai levu duadua me biuta na timi ni Fiji Bati ena sotasota ni vuravura ni Rugby League World Cup.

Oqo e sa i karua ni nodratou qaqa na noda mata timi.

Matai ni qaqa vua na timi ni Amerika, karua ni qaqa oqo vei Welesi.

Ia na siga Vakaraubuka oqo, eratou sa vakanamata na noda mata timi ni Vodafone Fiji Bati ki na timi ni Itali.

Era tukuna na daunididigo, ni kevaka eratou druka madaga vei Itali, eratou sa na cabe cake ga ki na sotasota ni kotafainala na noda mata timi ki na sotasota oqo ni vuravura.

Vakadeitaki talega ena vola  tukutuku ni Qito Rakavi ni vuravura, ni matai ni dauqito me tabaka rawa  e 14 na sikoa ena sotasota ni vuravura ko Jarryd Hayne.

Eda matalau ni da sarava na mataqali qito era kilai tani kina na noda cauravou, ena veipasi, na kaukauwa ni nodratou tataqomaki kei na nodratou sa kabakoro tiko na mata timi ni Vodafone Fiji Bati.

E ratou sega ni taqeya rawa na timi tagane ni Welesi na kaukauwa kei na kila ni qito e tiko vei iratou na noda cauravou.

E vakasakiti na nodratou qito ka cakacaka vata na i yatu e liu, me vakataki Ashton Sims, Junior Roqica kei Eloni Vunakece.

E na i yatu e muri, e ratou vakaraitaka na kila kei na taledi ni qito oya mai vei Suliasi Vunivalu, Akuila Uate, Tui Kamikamica kei Hayne.

Ni da se tikoga ena qito rakavi ena Rugby League, e ratou vakacakacakai iratou talega na mata timi mai na Pasifika me vakataki Toga, Samoa kei na timi kaukauwa ni Papua Niu Kini.

E sa niu ga kei madrai na nodrau sota toka na timi e rua o Samoa kei Toga ena mua ni macawa, ka veivolekati sara na kedrau kai.

Eda vakavinavinaka ni sa toso vinaka sara na nodratou qito na noda timi ni Bati ka sa tiko na vakanuinui ni ratou na tomana tikoga na nodratou cakacaka vata kei na i vakatagedegede vinaka ni qito rakavi e dau kilai tani kina na timi ni Viti.

E namaki me ratou na laki sota kei Itali na timi ni Vodafone Fiji Bati kei na timi ni Itali mai Canberra, na koroturaga kei Ositerelia ena mua ni macawa oqo.

Eda raica talega ni levu sara na veitokoni mai vei ira na noda mai Ositerelia ena nodra tokoni tiko ena qito kece na noda timi ni Vodafone Fiji Bati.

Eda kila deivaki talega ni levu vei ira na lewe ni Vodafone Fiji Bati eratou sa vakavakarau vinaka talega ena vuku ni sotasota oqo.

E ra sa vakarautaki ira mai vakayago, vakayalo kei na vakasama ka ra laki valataki vanua ena sotasota ni Rugby League World Cup ka vakayacori tiko mai Niusiladi kei Ositerelia.

E dua talega na timi ni Viti ena qito rakavi, oya na Fiji Airways Drua eratou vakacakacakai iratou talega ena I matai ni sotasota ni PRC ka tekivutaki ena yabaki oqo.

 E laurai na tubu kei na kila ni qito rakavi ena timi oqo ni Drua ni ratou laki yacova sara na i vatavata ni semifainala, dina madaga ni se qai sevu ni gauna me ratou  curu kina ena sotasota oqo.  Eratou laki sota kei ira na timi ni kalavo mai Ositerelia.

Kaya na nodratou dauniveivakatavulici ni timi ni Drua o Senirusi Seruvakula ni levu sara na ka e ratou vulica ka rawa ni vakavinakataki ni bera tale na  sotasota oqo ena yabaki ka tu mai.

Eda na duavata, ka tukuna ni  sa kalougata dina o Viti ena vuku ni taledi ni qito rakavi e vakarautaka tu na Kalou vei ira na noda cauravou kei na i tabagone, era sa vakarogoya tu kina na yaca ni noda vanua.

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.