Mai Drevekai ki Nakauvadra Viliame Ravai | Monday, November 20, 2017

ESA koto oqo e ra nai kuri ni tukutuku ka dau veibulagoci tiko mai kina ko Peni Tabua Tamanivalu na turaga ni Naloto ena veimacawa, ni wiliwili sara yani.

Ia, ena macawa sa oti e laveta tiko mai o Peni Tabua e dua na i tukutuku bibi ka tiko e na loma ni qaqa ni vucu ni KAUWAI ka sa dodonu me da na qaqarauni kina.

Au sa kerea saka na veivosoti e noda Viti raraba

De levu vei keda e na sega beka ni ciqoma rawa

Au sureta saka na vanua mo wawa ka vakarorogo mada

Ni sa na takoso na Kalou ena sega tale e dua ena tu rawa

?Nai kuri ni vucu e tiko oqo e cake e vakaraitaka tiko na kere veivosoti e na noda Viti raraba e na vuku ni tukutuku esa serelaki tiko yani oqo ena so vei kemuni o ni na sega ni taleitaka ka ni vaka me tukutuku vou tiko e daligamuni,? e kaya o Tabua.

Ia, e kaya na turaga ni Naloto oqo ni tukutuku oqo esa takoso tiko kina na Kalou me vakayacora na nona kaukauwa ena vuku ni vanua oqo ko Viti ka sa dodonu me na vakarorogo ka talairawarawa kina na vanua.

Serekali bibi na KAUWAI au kerea me sa mai tini

Ni vakarorogo saka mada vakavinaka na lewe i Viti

Noda Kalou sa wirica na i vakawirimadigi me taiki

Me tekicuva na vanua me rokova ka rerevaka na Vunau e Tini

E tukuna o Tabua ena vuku ni tukutuku bibi esa serelaka tiko mai e na vica na macawa sa oti ena vuku ni serekali se vucu ni KAUWAI ni sa na vakarau me na mai tini tiko ena dua gauna mai oqo ka gadrevi tiko kina na noda vakarorogovinaka na lewei Viti ka ni sa taleva na vanua o Viti na noda Kalou me na wirica na nona vakawirimadigi.

?Na vuna esa vakayacora kina na Kalou na vakawirimadigi oya me sa na tekicuva na vanua o Viti me na vakalesui tale mai na kena rokovi tiko na Vunau e Tini sai koya na i vunau ni Kalou ka a solia vei ira na nona tamata me ra rokova mai na gauna e bulia oti kina na vuravura me yacova mai nikua ni dodonu me na rokovi tikoga ka tawa mudu,? e kaya o Tabua.

E kuria e na nona i tukutuku ko Peni Tabua ni sa dodonu ga vei Viti kei na kena kawa tamata me lesu tale vua na Kalou ena i otioti ni gauna eda donumaka tiko oqo ka me rawa ni sobu tiko mai vei keda na kaukauwa ni mana kei na sau ni nona vakatulewa dodonu na Kalou.

Me rawa ni da sota kaya tiko kina na nona veivakalougatataki vakauasivi ena noda sotava tiko na veika vinaka e na noda bula ka me rawa ni lako siviti keda tiko na i naki ni meca mai vei ira na noda era sa meca tiko vinaka e na gauna qo ena noda veikorokoro ka ra bula tu ga e na loma ni dau kakase, vosa kudrukudru kei na veidabui levu ka ra tokara wale tu ga e gusudra na i sulu ni lotu.

Sai koya saka oqo na ka vuni ena bula kina na vanua

Ni sa ciqoma o Viti me muria nai vakaro ni Kalou bula

Sa na qai yaco na veivakalougatataki i Jiova ni Lewe Vuqa

Na bula sautu kei na veilomani sai i divi tu ni noda vanua

?Na i kuri ni vucu e tiko oqo e cake e dusia tiko ni na ka duadua ga e rawa ni bula kina na vanua o Viti oya me na ciqoma na i vakaro ni Kalou sai koya na i Vunau e Tini ni sai koya duadua oya ena vakalougatataka kina na Kalou na noda vanua,? e kaya o Tabua.

E kuria o Tabua ni oya e na vakavuna me na sautu kina na vanua ka basika talega na veilomani vei keda na kawa i Taukei kei ira na vei mata tamata era sa mai bula ka vakaitikotiko tudei tiko e na noda vanua.

?Na sautu ni bula ni kawa i Taukei ena yaco mai kevaka eda vakarorogo ki vua na noda i liuliu vaka tamata e vuravura e na ruku ni nona lewa na Kalou na dauveibuli o koya ka a lesia na veituraga ka ra liutaki keda ena noda bula vaka kawa i Taukei,? e kaya o Tabua.

E tomana o Tabua ni sa dodonu me na kidava na tamata yadua ni da sa bula tiko ena dua na gauna vakadomobula sara ena vuku ni da sa sarava sara tu ga na vakadomobula ni loma ni tamata ena nodra sa qitotaka na i valavala ca.

Au sauvuki me?u vakarogoca na vanua ni vakasolokakana.

Na lewa ni Kalou bula me kakua sara na tu saqata

Me sa bola na sau i na Mua i ra mo vakarautaka mada

Ra kaciva nai vola vivigi ni Veitarogi vanua ni Viti makawa

?Au na vakaraitaka tale nai kuri ni vucu e tiko oqo e cake esa dusimaka tiko ni na dola na lewa ni Kalou me na sereka na mua i Ra ni noda vanua ka me vakadinadinataki tale na kaukauwa vuni e maroroi koto e na dela ni kena vanua ka me waraka na gauna sa loku,? e kaya o Tabua.

E kuria o Tabua ni na dolavi talega kina na i vola vivigi ni Veitarogi Vanua ni Viti makawa se na ka dina me baleti Viti ka maroroi vinaka tiko e na lomada na kawa i Taukei ka sa na sega tale ni dua e rawa ni saqata ni sa na vakatulewa kina o koya na turaga ni lewa dodonu sa i koya duadua ga na Kalou.

Ena qai tomani tale yani.

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.