Kunei na sui Viliame Ravai | Monday, November 27, 2017

Update: 10:19AM E LAURAI ena qara ko Lutunatabua na binibini sui ni tamata ka nanumi ni nodra sui na tawa vanua taumada ena colo kei Navosa.

Oqori na veika e vakaraitaka ko Keni Vale, e dua vei ira na kawa nei Sasaroko. Na turaga oqo ko Sasaroko na i matai ni turaga ka tawa vanua taumada ena colo kei Navosa ena nona biubiu mai Nakauvadra ena vuku ni veisei se ivalu ni lotu ka vakayacori mai Nakauvadra ni bera ni qai yaco yani ki Navosa nai lakolako mai Verata.

Na ibinibini sui qo a laurai ena dua na basoga ni qara vatu ena gauna a veisiko voli kina Nai Lalakai ena colo kei Navosa.

�Na binibini sui e laurai ena basoga ni qara qo e nodra sui na neimami qase ka ra tawa vanua taumada e na colo qo kei Navosa,� e kaya o Vale.

E tukuna o Vale ni basoga ni qara ka ra laurai kina na sui e nodra ibulubulu tiko na turaga kei na marama ka ra a tawa vanua taumada. E liu e dau dredre sara na nodra dau buluti na noda qase ka dau sala rawarawa ga me ra dau vunitaki na yagodra ena loma ni qara ena gauna era sa bale kina.

�Ni gauna tu ni veivaluvaluti ya ka ra dau vunitaki dredre na yagodra na tawa vanua ena gauna oya.

� Baleta ni rawa ni butakoci na yago ena bogi na dau laki vakayacori tale kina eso na cakacaka ni vakacuru se vakatevoro mai vei ira na meca,� e kaya o Vale.

Ia, e na i vola na Tukutuku kei Viti Makawa, e vakaraitaki kina na i tukutuku ni dau biu na yago ena i vakasara se ena veiqara vatu mera dau vunitaki kina ena gauna esa bale kina e dua ena vuku ni kena nanumi ni na rawa ni ra butakoca na yago na meca ka ra kauta na kaukauwa kei na mana e tiko vei koya esa bale oya.

�Na sui era tu qo ena loma ni qara era se tu makawa ka levu ga na sui era sa kakavuruvuru ka ni sa dede na kena tu,� e kaya o Vale.

E laurai talega eso na sui lalai ka vakabauti ni nodra sui na gone lalai ka ra mai bale koto ena gauna ni tawa vanua taumada e Navosa. Na qara oqo e rauta ni ono na aua na nomu taubaletaka mo na qai yacova yani na qara vatu o Lutunatabua, ni ko biubiu mai nai tikotiko vagalala o Navatulevu.

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.