Na qolivi kei na volitaki ni dri VILIAME GAVOKA | Monday, December 4, 2017

ENA noda veiwasei ena macawa oqo, au gadreva meda tuvatuva ka vakavinaka me baleta na kena qolivi na dri ni sa mai vakatabui tiko na qolivi ni sasalu oqo .

E vakaitamera sara na i lavo e dau rawata na dri, ka ni tu na kena makete levu e Jaina (China).

Era kaya o ira na dauvoli dri e Viti ka ra la?ki volitaka e Jaina; ni vica ga na auwa na kena yaco yani na dri, ka sa voli oti kece. Oqo e veivakauqeti nida rogoca nida qai sega ni la?ki vaqara tale na makete.

E nai voli tale kei Viti eso, e dau ka ni buno toka na vaqara na makete, oya wili kina na suka, vaini, mahogany, saravanua kei na so tale.

Ia, e dua tani taudua na dri, ka da rawa ni kaya, ni kena levu ga na kena vinaka.

Na dri; me vaka eda kila ni a dua veirau nai voli e kauti ira mai na dauniveivoli ena gauna koya ni se bera ni soli o Viti ki Peritania.

Kena i karua na yasi. E daidai e rau se sau vinaka tikoga, ka tu vinaka na kedrau makete, ia, kena leqa ga ni rau sa lailai sara tiko, ka dodonu me rau vakatuburi tale vakalevu.

E dina ni tara sara tiko na lewe vuqa na vakatatabu oqo, ia, kevaka eda yalovata ena kauta mai na veigauna vinaka mai muri.

Meda okata na vakatatabu oqo me vaka na teiteivaki ni dua na i tei ka na yaco mai na gauna me matua kina ka tamusiki.

Nida tea na dovu, eda na kilavakacaca e vica na tani ena rawati kina kei na kena i lavo; vakakina na dalo, raisi, tavioka se i tei cava ga.

Me vaka talega oya na dri. Meda kila na levu ni noda i qoliqoli e vakatabui ka na vica na levu ni dri ena rawati mai kina.

Oqo eratou na rawata vei keda na kena dau ena tabacaka ni Qoli.

Ena vukea sara na noda ciqoma na vakatatabu kevaka eda kila se vica na levu ni lavo eda na rawata ni sa cava na vakatatabu.

Me kau cake na vakatutu oqo kina bose ni Tikina; la?ki veitalanoataki ena matabose ni Yasana; ka yaco sara kina Minisitiri ni iTaukei.

Oqo me vakabibitaki, ka kua ni vakaweleweletaki e dua na sala ni veivakailavotaki ka rawa mai ena noda i qoliqoli.

Me i tavi ni noda Minisitiri me sema kina Minisitiri ni Qoli, ka raica me yaco dina na veika oqo.

Ni ratou qai vakasuka i tukutuku mai na noda Minisitiri, me sa tiko vei iratou na vei mataqali lavo vakacava e rawata na veiqoliqoli yadudua.

Nida sa kila oqo, sa na dua tani na noda taqomaka na noda i qoliqoli ka qarauna me susugi vinaka na dri ena vakatatabu ka yaco tiko.

Me vaka oqo na noda okata na noda i qoliqoli, ena noda kila na mataqali lavo vakacava eda rawata kina.

Kevaka eda sa rawata oqo, e sa na duatani na nodra okati keda o ira na wekada mata tamata eda lewei Viti vata tu ni kua.

Era kila; eda kila ni o keda eda kilai ga ena liga lala; ia, nida yalo vata me vaka oqo na noda maroroya na dri me vakailavotaki keda, ena veisau na veiwekani.

O ira mada ga na baqe, kei na dau ni bisinisi era na dolava vei keda na veika era sogota tu vei keda e daidai, baleta ni malumalumu na noda sala ni veivakailavotaki.

Era na raica ni sa duatani oqo. E susugi na dri me levu, ka tu na kena makete e volitaki kina.

E dodonu vei keda meda yalovata ka tuvatuva ka rawa oqo, se me vakacava na kena qolivi na dri.

Ena vinaka mera vakaduri na kena veikomiti ka sema ki na tabana ni qoliqoli mera vakatulewa ena tikina oqo.

E daumaka kevaka me vagolei na veika e rawa mai ena dri ki na veivakatorocaketaki eso eda gadreva tu (projects).

Eda raica na vinaka ni nodra i tikotiko o ira era lewa vakayalomatua na nodra i lavo vakayavusa se vakaitokatoka, ka dodonu me vakatalega koya o keda eda vakaiqoliqoli ka rawa ka ena dri.

Eda na sega ni qai la?ki kerekere tale vua e dua oqo ni sa na tekivu me vakatawani mai na noke ni lavo ena kena sa levu na dri, qolivi, ka volitaki ki na kena makete e Jaina.

Ia, e ka bibi duadua meda ciqoma na vakatatabu oqo, ka raica na vakaitamera ni veika ena waraki keda ena dua na gauna lekaleka ga oqo.

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.