E ka bibi na veirogorogoci: Nawadra UNAISI RATUBALAVU | Monday, December 4, 2017

Ni wilika yani oqo na i toma ni neitou veitalanoa na Nai Lalakai kei na Qase Levu o Talatala Tevita Nawadra ni sa na mai cava tiko ena yabaki oqo na nona i tavi ena i tutu bibi oqo. Ni wiliwili sara yani.

LALAKAI: Esa mai vakarau cava ena Tiseba oqo na i katolu ni yabaki ni nomuni qarava tiko mai na cakacaka ni Qase Levu ena loma ni Lotu Wesele e Viti kei Rotuma. Ni vakamacalataka ga se vakacava sara tu na nomuni rai ena vuku ni veiqaravi ena i tutu bibi oqo?

NAWADRA: Au vakavinavinakataka ni soli vei au e dua na gauna me dua na veitalanoa oqo.

Au se qai lesu sara tikoga mai Bua ena macawa rua sa oti, na i otioti ni lakolako ni veivakatikori vei ira na noda Talatala Qase.

O ira na noda i Talatala Qase era qai dau laki cakava na cakacaka ni veivakatikori vei ira na i Talatala ni veitabacakacaka kei ira na i vakatawa.

Na i otioti ni Talatala Qase mai Biaugunu, au sa laki qarava oti ga mai oqo na nona vakatikori.

LALAKAI: Na cava na veika ko ni raica ni ko ni laki veisiko ena wasewase ni lotu, vakauasivi ena taudaku ni veikoro lelevu?

NAWADRA: Au raica rawa ni se tu vinaka sara tu ga na veiqaravi kei na i tovo vakavanua e kilai tani kina e dua na yasana, se dua na tikina.

Au raica talega ni levu vei ira na wasewase ni lotu, e sa dua na ka na nodra maroroya ka ra dau raici ira tu na i talai ni Kalou, ka ra qarauna sara me ra dau qaravi ira vakavinaka.

Vei au, na noqu dau yaco yani ena dua na i Wasewase ni lotu, au na dau segata talega ena noqu i gu me?u kauti au sobu, ka me?u laki veitalanoa kei ira na lewenilotu.

Kau dau taleitaka me?u rogoca eso na nodra nanuma ena kena tosoi e liu na lotu, eso na nodra vakatataro ena veika e yaco tu ena loma ni lotu, e dau gauna vinaka me ra dau sikovi ka vukei.

LALAKAI: Na veika e sa rawata toka qo na Lotu Wesele ena loma ni tolu na yabaki ni nomuni veiqaravi?

NAWADRA: Vinaka, na ka bibi saraga au raica rawa ni dodonu me na vakavinakataki, oya me na matata vinaka vei keitou i valenivolavola na i tuvatuva kei na lawa eso e tuvalaki kina na neitou cakacaka. Na ka bibi talega e mai qaravi rawa na kena vakadeitaki ka vakavinakataki na Yavu ni Vakavulewa me na cici kina na lotu.

E sega ni tavi rawarawa, ka sa bibi me keimami dau veirogorogoci ka moici toka na lotu me na rawa ni taqoqo tiko na i lakolako.

E dua talega na ka e sa mai rawati, oya na kena sagai me sa cicivaki koya ga na bisinisi ni lotu, oya na Lako Yani Vou.

Ka kena i naki tikoga me na tosoi e liu ka tu vinaka na lotu ena nona veika vakailavo, ka me na qarava kina na cakacaka ni veivuke vakayago vei ira na lewenivanua kece e Viti.

LALAKAI: Dua ga na nomuni tatau?

NAWADRA: E dua ga na noqu i tatau, oya me da sa wilika ka bulataka na veika e vinakata vei keda na Kalou me da na cakava ena nona Vosa.

E dodonu vei keimami kece na i Talatala me na vinaka tiko na neimami veiwekani kei na Kalou, na veika vakayago kei na kena qaravi vakavinaka o ira na lewenisipi.

E sega ni tavi rawarawa, ia eda na kerea tikoga vakalevu na nona veivakaukauwataki na Kalou levu na Yalo Tabu ka me na liutaki keda tiko ena sala e dodonu ka savasava.

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.