Sereki ni vuli UNAISI RATUBALAVU | Monday, December 4, 2017

ESA tekivutaki ena macawa oqo na nodra vakacagicagi na luveda.

 E dau gauna namaki vei ira baleta ni rauta ni walu na macawa na nodra na gade ka sereki na luveda, ni mai cava e dua na yabaki vakavuli.

 Ena macawa sa oti, e da raica ka sarava ena tabana ni tukutuku e Viti na i tukutuku ni cavu isasau mai vei ira na luveda kei na i talanoa ni nodra sasaga me ra rawata na maka vinaka ena vuku ni vuli ena koronivuli ni paraimiri, na kena ena sekeniri kei na univesiti.

 E dua na gauna marautaki vei ira na luveda ni ra sa mai rawata ka qarava sara vakavinaka na nodra vuli, dina ni levu na bolebole era sotava ena veisiga.

 E da vakavinavinaka talega vei ira na luveda era vosota na dredre ni bula mai vale, e sega beka ni rawata  na nodra i tubutubu na veika era vinakata ena vuku ni tuvaki ni vale, se na kakana vinaka, ia e sega ni vakataotaka na nodra gugumatua ena vuli.

 E da vakavinavinaka talega vei ira na qasenivuli kei na gonevuli ena nodra vosota na i tuvaki ni nodra valenivuli, oqo vei ira na koronivuli e sebera ni vakaoti na nodra vakacokotaki ena vuku ni cagilaba ko  Winston.

 E so vei ira na luveda era veitarogi ena Kalasi 6 kei na Kalasi 8, se na Fomu 4, 6 kei na 7 era vosota voli na vuli ena loma ni vale laca, ka ra laki tiko ena bure e sega soti sara ni tara tu vakavinaka.

 Eda sa vakavinavinaka ga ni tu vei ira na gone oqo na yalo ni bolebole ka sega ni ra vakayavalati ena vuku ni tuvaki ni nodra valenivuli se bure ni moce, e ka bibi ga vei ira me ra laki vuli ka rawata na veika vakavuli me vaka e sa namaka tiko mai na nodra vuvale ni ra na vuli me ra na rawata vinaka na nodra bula ena veisiga ni mataka.

 Eda sa vakavinavinakataki ira talega na qasenivuli ena cakacaka levu era qarava mai ena vuku ni nodra lomani ka vakatavulici na luvedra ena bula ni kila ka.

 E sega ni rawarawa na nodra i tavi na qasenivuli, baleta ni ra sa vakatabui ena veimoku, ka sega ni rawarawa na nodra na  moica toka eso na i vakarau ni gone me na vakarawarawataka na nodra veiqaravi ena loma ni valenivuli.

Ena gauna ni sereki oqo, ena daumaka talega me ra na qarauni tiko na luveda, baleta ni rawa ni levu na vakacalaka ena rawa ni yaco.

 Na bula ni veimurimuri, na laki sisili ena tobu se na uciwai, na kena gunuvi na yaqona ni valagi, se na yaqona ni Viti.

 Eso vei ira na luveda era sa Fomu 6 se Fomu 7, era sa na douvaka eso na i tovo ni bula e sega ni dodonu me ra na bulataka, esa ka bibi kina na noda yadrava tiko na noda i tavi na i tubutubu.

 Na i tavi ni veituberi kei na veivakasalataki vei ira na luveda cauravou kei ira na goneyalewa.

 E ka bibi meda na dau lokuca e dua na gauna ena veisiga me da na dabe vata vakavuvale ka marautaka ira na luveda, ka da veitalanoa.

Ni levu ga na noda gauna vata vakavuvale, eda veitalanoa vata ka veilomani tiko, ena taqoqo tiko na noda vuvale ka susugi eso na vuvale vinaka e Viti ena veisiga ni mataka.

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.