Na qaqarauni e gaunisala UNAISI RATUBALAVU | Monday, December 18, 2017

Update: 10:40AM E SA vo ga oqo e 18 na siga me da sa yacova yani na yabaki vou, 2018. E sa levu na osooso ni noda veitauni lelevu ena vuku ni noda vakavakarau ki na soqo namaki ena veiyabaki oya na Siganisucu.

E levu na vuvale era sa volivoli ka maqusa tiko ena kena vakarautaki na nodrai tikotiko kei na veika me na vakarautaki ena siga namaki oya.

E na gauna osooso talega vakaoqo, kevaka eda na sega ni qaqarauni ka lewa vinaka na noda i tuvatuva, eda na rawa ni vakatulewataka tu eso na ka ena kauta mai na leqa ena noda bula.

E na macawa oqo e mai kacivaki kina ena tabana ni tukutuku na nona mai leqa e dua na marama yabaki 57 ni oti na nona laucoqa ena basi e na Rodwell Rd e Suva ena siga Moniti.

E da sa vakasalataki tiko na lewenivanua me da na qaqarauni ena noda taubale e gaunisala.

Vei kemuni na draiva, esa kerei na nomuni vakamuria na lawa ni gaunisala ena veigauna taucoko.

Ena vakarawarawataka vei iratou na ovisa kei na tabana ni lawa kevaka walega eda dau muria na i valasala kei na lawa e sa virikotora na noda matanitu.

E ka bibi tiko na nodra taqomaki tiko na lewenivanua e Viti.

E laurai talega ni rua na kama e yaco ena macawa sa oti, na rumu ni veisele e na valenibula levu e Lautoka kei na kena kama na sitoa na J Santaram e Suva.

Ena gauna oqo e sa soli vei iratou na Tabacakacaka ni Ovisa na macala ni veivaqaqai me baleta na rua na kama oqo.

Ni da marautaka tiko na soqo ni marau e vuqa ena noda vanua ni cakacaka se na i soqosoqo eda lewena, e sa namaki tu ni da na qaqarauni tale tikoga.

Ena  levu talega na veikoro kei na i tikotiko era na rawa ni vakayaco soqo tiko ena gauna oqo, ka meda na qaqarauni talega ni ra dau yavala kina o ira na daubutako ni dau lala tu eso na vale era vutuniyau na kena i taukei.

Esa kerekere tikoga na noda tutuna oqo, ni da na marautaka tiko na soqo eda na laki soqoni kina, ia me da na qaqarauni talega.

Na kena vakayagataki vakasivia na yaqona ni valagi, na kakana eda kania, na nodra bula na i solisoli kei na kena kilai na vanua era tiko kina na lewenivuvale.

Ni sereki tu oqo na vuli vei ira na luveda, e bibi tiko me da na kila na cava era cakava tiko ena veisiga, se na vanua era tiko kina.

Me da na yadrava toka na tikina oya, baleta ni levu na gauna era dau coriti tu na luveda ena so na i valavala ni bula era dau veivutunitaka, ia sa bera ni ra sa coriti tu.

Esa nuitaki tu ni da na marautaka tiko na veika eda qarava ena veisiga ka vakararavitaki vua na Kalou na Tamada na bula ena veisiga ka me na veiliutaki tiko ena noda i lakolako ena veigauna kece.

Meda na qarava vinaka na noda i tavi eda vakacolati kina, ka me da kila ni da sega ni cakacaka wale tiko, e tiko e dua e da sega ni raica ena sauma votu vei keda na noda cakacaka ena vuravura eda bula tiko kina ena gauna oqo.

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.