Lagilagi na siga ni soli i covi e Gusuisavu VILIAME RAVAI | Monday, December 18, 2017

Update: 10:45AM E DUA na siga marautaki vei ira na gonevuli ka vaka kina ko ira nai tubutubu kei na dauniveisusu ena loma koro ko Gusuisavu ena nodra mai tauri covi tale na gone ni mai cava e dua na yabaki vakavuli. Era mai tauri i covi qo na gonevuli me tekivu sara ga mai na sovanivuli me yacovi ira sara na vuli tara ena vuli cakacaka ena vei univesiti e Viti.

 Oqo esa i karua ni gauna me vakayacori kina ena koro ko Gusuisavu na nodra tauri i covi na kena gonevuli ka salavata koto ga kei na veika e rawata mai na duidui koronivuli era vuli tiko kina ena veiyasai Viti.

Era vakaitavi ena soli icovi qo na veituraga ni mataqali kei na vulagi sureti ka vaka kina na qasenivuli liu mai na koronivuli e Naqali (Naqali District School) kei na qasenivuli vuli liu mai Viria (Viria District School).

Na i covi e vakarautaki, na sitivikiti vei ira kece sara na gonevuli, bilo siliva kei na metali vei ira era vakaitutu mai na veikoronivuli era vuli tiko kina kei na veika e ra rawata ena rara ni qito.

E vakaraitaka na qasenivuli liu e Naqali ni se qai matai ni gauna vua me tiko ena dua na mataqali soqo ni soli i covi vakaoqo ena dua na koro vakaviti ena nodra tauri i covi na gonevuli.

E kaya ni tarai koya ni sa oti qo e 20 na yabaki na nona cakacaka vakaqasenivuli qai mai vakadinadinataka e dua na soqo lagilagi ena nodra kauiwaitaki tiko na gonevuli ena loma ni dua na koro vakaviti mai vei ira na i tubutubu, dauniveisusu.

Ia, na soqo ni soli i covi oqo e ratou vakarautaka na komiti ni vuli ka vakailavotaki ga mai vei ira na lewenikoro e Gusuisavu. Na koro ko Gusuisavu e wili tiko ena loma ni tikina o Viria ena loma i yasana o Naitasiri.

Na kena qaravi na soqo era yadua nai tabe na veivuvale kece sara ena loma ni koro me i vaqa ni soqo ka ra bau veivuke talega mai eso na tabana ena vuku ni covi ka ra bau dodoliga talega mai na dauraivuli ena koronivuli na paraimari ena i wasewase e loma ka peresitedi tale tikoga ni komiti ni vuli e Gusuisavuko Marika Baleca. Era lewe tikoga ni komiti ni vuli ko ira na gone ni Gusuisavu era tu vakacakacaka ena koro ni cakacaka kei ira na tikoga e nakoro.

E sega walega ni ra tauri covi na gonevuli ena siga Tusiti sa oti a bau ciqoma talega na nona i covi na turaganikoro ko Navitalai Matanawa ena nona dautokona ka cuqena na sasaga ni veivakatorocaketaki ni vuli kei na bula raraba ena loma ni koro.

Ni oti na kena soli nai covi, era qai mai vakaitavi na gonevuli ena vakatasuasua ena meke vakaviti, meke vakavalagi ena kena muri na i vakatagi ia era malaude na i tubutubu ka ra bau vakayagataka talega na i vakatagi.

Nai wiliwili ni gonevuli e Gusuisavu me tekivu mai vei ira na sovanivuli, paraimari, sekenari, kei ira na na vuli toro cake ena vuli cakacaka (tertiary) e rauta tiko ni ra lewe 117 taucoko ena yabaki qo.

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.