Mai Drevekai ki Nakauvadra VILIAME RAVAI | Monday, December 18, 2017

Update: 11:33AM ESA koto oqo e ra nai kuri ni tukutuku nei Peni Tabua Tamanivalu na turaga ni Naloto ka veibulagoci tiko vei keda e na veimacawa, ni wiliwili sara yani.

E vakaraitaka ko Peni Tabua e dua na vucu ka vaka koto oqo na qaqana, 

Na kaukauwa levu sa curuma na kena cakacaka

Ni soli na kaukauwa mai bulu me vakayagataka

Vauci vata na vu ni vanua i na dagodago vakatamata

Me waicala na vanua ena ligai Ratu Sir Lala

�Ena vucu e toka e cake e tukuni ni a vakayagataka o Ratu Sir Lala na kaukauwa mai bulu me rawa ni cakava eso na cakacaka butobuto ena kena vakawaicalataki na noda vanua na kawa i taukei ka vakasesei keda me yacova tu mai nikua,� e kaya o Tabua.

Lutu na yaseyase me tibi na kena liva

Me suka na vanua me vude mai na dina

Veika kece sa lewa na Kalou me da qai raica

Nona vosa vuni na Dauveibuli ena gusu ni parofita

E tomana o Tabua ena i kuri ni tukutuku e tiko e cake ni sa da rorova tiko yani oqo e dua na gauna ni veisau ka sa na dodonu kina me da na ciqoma ni eso eda dau raici ira cake tu eda na raici ira sobu kei ira eso eda dau beci ira tu eda raici ira cake ni sa na vakalasikataki na dina ni veika e baleti keda na kawa i Taukei ena noda vanua dina ka a solia na Kalou me da bula kina me yacova na nona lesu mai.

Ia, e na macawa oqo e vakaraitaka o Tabua ni i kuri ni vucu e tiko e cake e vaka koto oqo, 

Vosa ni Kalou bula sa veivakasalataki

Me qarauni na meca sa vaka na laione sa tagi

Nona sasaga me vagolei na vanua i na sala tani

Me guilecava kina o Viti ni o koya na kawa digitaki

�Esa veivakasalataki dina tiko na vosa ni Kalou vei keda na kawa i Taukei ena kena qarauni na meca ni sa vaka tiko na laione sa tagi me vakasaqara eso me tiloma,� e kaya o Tabua. 

E tomana o Tabua ni sa sasaga sara tiko vakaukauwa na vuni ca me vakagolei na vanua ena sala tani me da nanuma kina ni sa donu na veika e caka tiko, ia e sega saraga ni donu.

�Eda sa donuya tiko oqo na gauna ni kaukauwa ni lawa ka vakarautaki me da qaqarauni kina ena vuku ni noda qele, kei na noda qoliqoli, e kaya o Tabua.

E tukuna o Tabua ni veika e yaco tiko oqo e vakayacori tiko ena kena dela ni gauna donu ka sa tuvalaka oti tale tu ga kina na nona i tuvatuva levu na Kalou na Dauveibuli me baleta na kawa i Taukei me na kidava tiko na lakolako esa mua tiko kina o Viti.

Ia, na i kuri ni vucu e tiko oqo e cake e koto oqo era e vaka koto oqo,

Na Kalou ko Jiova sa tekivu me vakayaco lomana

Me vakalesui ko Viti ki na ligadra na nona tamata

Me kila ko vuravura ni o Isireli e nona dina na i matai ni waqa

Vakadeitaki tu ena yaca i Viti na nodra yavusa kei na kawa

�Na kuri ni tukutuku e tukuni tiko e cake esa vakaraitaka na nona sa tekivu vakayaco lomana na noda Kalou ka veivunauci e na so na ka e tara na noda vanua ka me da rawa ni vuli kina me rawa ni vakalesui o Viti ki na ligadra dina na nona tamata,� e kaya o Tabua.

E tomana o Tabua ni sa dodonu kina me ra na kila na kai vuravura kei ira na Isireli ni o Viti e nona nai matai ni waqa ka vakamatatataki vinaka tu ena yaca ni noda vanua ena vuku ni vei yavusa kei na kawa i Taukei e Viti.

Na i kuri ni tukutuku ni vucu e koto oqo e cake esa tiko oqo era ka vaka koto oqo,

Lutu ni buto leka sa taiki vakamalua na noda vanua

Nai vola makawa kei Viti me rogoci tale vakadua

Me duri vou na matanitu ni Kalou kei na nona kaukauwa

Mo tucake na Isireli na kawa digitaki ni Ulumatua

�Na buto leka e yaco e na noda vanua e sega ni vakacalaka, oqo e vakavuna me sa taiki lesu na noda vanua ena kena gadrevi se vakaraitaki tale mada na i vola makawa ni noda vanua me na rogoci tale kina vakadua,� e kaya o Tabua.

E kuria na turaga ni Naloto oqo ni kena i naki ni buto leka oqo me na duri tale na nona matanitu na Kalou kei na nona kaukauwa ka me rawa ni tucake na Ulumatua ni kawa tamata digitaki sai koya na kawa i Taukei e Viti.

E kaya o Tabua ni kuri ni tukutuku ka serelaka tiko e na vucu, se lawata e koto oqo era ka vaka koto oqo,

Mo tucake na gone lomani mo saravi ena yasa e va ni lomalagi

Sa i iko na gone e vakasaqarai ni ko a yali

Ni ko kauta tiko vei iko na vosa ni veivakalougatataki

Ena i buki ni wa kulakula sa i vakadei ni kawa digitaki

�Esa gadrevi me na tucake na kawa Ulumatua ni kawa i Taukei me na tucake vakadodonu ka me rawa ni raici koya na yasa e va ni lomalagi ka me na saravi talega mai vanua tani,� e kaya o Tabua.

E tomana o Tabua ni gone lomani e tukuni tiko oqo sai koya na kawa Ulumatua taumada ka a kauta vata kei koya na vosa ni veivakalougatataki ka vakatakilakilataki tiko ena buki ni wa kulakula e na gauna e sucu mai kina me i vakadei tiko ni kawa digitaki. 

Ena qai tomani tale yani.

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.