Tubu totolo na bisinisi e Lomainasau Vola na Tabacakacaka i Taukei | Monday, February 12, 2018

NI bula vinaka na turaga, marama, cauravou, goneyalewa kei kemuni ragone. Au gadreva meu vagoleya na veikidavaki ena veidelaniyavu vakaturaga ena noda vanua, ina vanua vakaturaga o Kubuna kei na kena isasavu, na vanua vakaturaga o Burebasaga kei na kena isasavu kei na vanua vakaturaga o Tovata.

Qo na isevu ni cau ni Tabacakacaka iTaukei ena yabaki vou qo 2018, au veitataunaki tale mada yani ena tatadra levu ni Tabacakacaka oya ?Na Vanua Sautu, Na Viti Vinaka?. Ena macawa qo eda na wilika tiko kina na Lomainasau Development Cooperative Limited, qo ena koro o Lomanisau, na Tikina o Tokatoka ena Yasana o Tailevu.

Ni qai tadu yani na ilawalawa ni Tabacakacaka iTaukei ena Vakaraubuka sa oti sa veiwaraki tiko mai na vanua, ra dabe tiko na vuvale vakaturaga e Lomainasau kei na nodra lewe ni Bose Vanua, na turaga na Matalomai, na turaga Mataki Bau, turaga Vunikalou kei na turaga Mataki Vuci. Sa iratou qo na lewe ni Bose Vanua ka ratou vakatulewataka ka vakalougatataka na itavi e vakayacori ena vanua o Naseuvou. Ena irairai ga ni veikidavaki vakavanua, e keitou sa siqema rawa na vulagi na matata ni kena liutaki vakavinaka na vanua kei na nodra duavata na leweniyavusa o Naseuvou. Sa keitou vakila tale ga ni na katoa vinaka na neitou noke ni vakasokumuni itukutuku, me bulagoci kina o Viti me rawati na bula sautu kei na tiko vinaka.

Ni bera ni vakamacalataki na itekitekivu ni bisinisi ni koro e totoka na ivakamacala e vakaraitaka toka o Ratu Sekove Qereqeretabua me baleta na bula vakavanua kei na kena sasagataki me vakavotukanataki na bisinisi ena dua na koro.

E vakaraitaka o Ratu Sekove Qereqeretabua ni dodonu me tekivutaki na bula ni veivakaturagataki kei na veirogorogoci ena lomanivuvale. E kuria, ni qori na yavu ni nodrau dau qarava na itavi ni vanua kei na turaga na Tui Lomainasau. Ni sa bulataki na loloma ena vuvale vakaturaga sa na qai rawa ni liutaki vakavinaka na Vanua. E qai kuria, ni rawati ga na veika taucoko qo ena nodratou veilomani ka veirogorogoci na lewe ni Bose Vanua, na cakacakataki ni lewa ni Bose Vakoro, na nodratou gugumatua na komiti ni kena cicivaki na bisinisi ni koro kei na nodra duavata na lewenivanua taucoko ena koro o Lomainasau.

Na Lomainasau Development Cooperative Limited a tauyavutaki ena i ka 5 ni Me ni 2015. A duri rawa ena veivakadonui ni Bose Vanua, na Bose Vakoro ka ra duavata kina na leweniyavusa. E vakaraitaka na Jemeni ni Bisinisi ni Koro o Aminiasi Kenatale ni rauta e $80,000 na ilavo ni koro eratou a tekivu kina. A voli taumada na keria ni koro me veivuke ena veivakaleleci.

Ena gauna qo sa rua tiko na keria, e dua e veiusa vakatabakidua vei ira na gonevuli ena 6 na koro e Tokatoka, na ikarua ni keria e ratou redetaka tiko na Tabana ni Wai. Na keria ni gonevuli, e rauta ni 200 na gonevuli e usana tiko ena dua na siga. Ena lomanimacawa, e sa vakatabakidua sara ga na keria qo vei ira na gonevuli. Ia ena Vakarauwai kei na Sigatabu sa qai rawa ni dau vakayagataki ena veiusa tale eso.

Na Tabacakacaka iTaukei e vakabauta ka sa vakadinadinataka na vanua ga e matata na kena veiliutaki, e rokovi na kena Bose Vanua ka cakacakataki na lewa ni Bose Vakoro ena kunea na bula sautu, na tiko vinaka ni lewenikoro kei na veilomani dina vakavanua yavutaki ena bula vaKarisito.

Ena macawa mai qo, eda na qai wilika kina na kena sa tete ena loma ga ni dua na yabaki na bisinisi e Lomainasau.

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.