Marautaki na qaqa nei Viti UNAISI RATUBALAVU | Monday, February 12, 2018

E DUA na mua ni macawa taleitaki sara vei keda kece na lewei Viti ni ratou laveta mai na rara e Hamilton na noda toa ni vala ni oti na nodratou qaqa vei Sauca Aferika ena fainala ena bogi ni Siga Tabu.

E duidui sara na veika era kaya eso ni oti na nodratou vakaitavi ena macawa yani e liu mai Serene kei na qito eratou vakayacora ena mua ni macawa na noda mata timi le yavitu, na Fiji Airways Fiji 7s.

 E da raica talega na veitokoni vei iratou na cauravou mai vei ira na dauniveitokoni mai Niusiladi, eda vakadinadinataka ni sa dua na timi e kilai levu ena buturara ni qito leyavitu e vuravura na noda mata timi.

 E rogo na kaila kei na mamarau ena veivale ni sa qaqa na noda timi vua na timi ka liu tiko ena poidi ni IRB World Rugby Sevens Series na timi ni Sauca Aferika.

 Dina ni mai rogo e levu na vosa kei na vosa kudrukudru me baleta na timi kei na dauniveivakatavulici, ia e vakadeitaka na Minisita ni Qito o Laisenia Tuitubou ni dodonu me da na solia na galala kei na veitokoni vua na dauniveivakatavulici ni timi o Gareth Baber.

 E vakila talega na turaga oqo na bolebole e sotava ena nona mai taura na i tutu oqo.

 Mai na i vakatagedegede ni veivakatavulici kei na tagede ni qito e vakayacora mai o Ben Ryan ena kena mai rawati na i matai ni koula ena Olympics.

 Qai mai gole o Ryan ka qai gole mai oqo o Baber, e sa kila tiko o koya na nanamaki e dau tu vei keda kece na lewei Viti kei na noda dau vakamuria tu na qito oqo na rakavi leyavitu baleta ni dua na ka oqo e kauti keda vata mai na lewei Viti.

 Eda dau guilecava kina na noda duidui, ka dua na marau levu e dau yacovi keda ni dau qito vakavinaka na noda mata timi ka rawata mai na qaqa.

 Ia, ena vula mai qo kei na Evereli eda sa na nanamaki tale ena sotasota ka tarava mai Amerika ni bera na qito ni Commonwealth Games ena vakayacori e Ositerelia.

 Eda vakavinavinaka ni sa rawata mai oqo o Viti na qaqa, ka sa lade cake tale ki na i katolu ni tutu ena i tuvatuva ni poidi.

 Eda nuidei ni na cava na sotasota oqo ni HSBC World Rugby Sevens Series, eratou na rawata na i matai ni tutu na noda toa ni vala.

 E dodonu me da na veitokoni ga na lewenivanua e Viti, ka vakavinavinakataka na nodratou laki valataki vanua tiko ena gauna eratou lade kina e rara.

 E dina beka ni duidui sara na rawa ka vakailavo ni veika era saumi kina na cauravou e Viti kei ira na dauqito mai valagi, eda vakavinavinakataka na taledi vinaka ni qito e tiko vei ira na cauravou ni Viti ka sega walega ni ra valataka na timi ni Viti, e dua talega na i wase levu ni gone i Taukei era sa qito tu ena veitimi lelevu me vakataki Niusiladi kei Varanise.

 E ra sa laki vakacakacakai ira talega na gone ni Viti ena sotasota  ni rakavi e Niusiladi, Ositerelia kei na kena mai Iurope ena i vakarau ni qito kei na kila esa tu vei ira.

 Eda sa na nanamaki tale tu oqo ena sotasota mai Las Vegas ena mua ni vula mai oqo.

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.