Lavo vinaka mai na qele VILIAME ODRO | Monday, April 16, 2018

NAI matai sara ga ni lavo au dau rawata e na veisiga kece au mai basa kina e na makete levu e Suva, au na dau biuta no vakatikitiki e na tutu ni noqu baosi, me noqu soli i valenilotu e na vei Siga Tabu.

Veitalia sara ke $5, $10 se $20, au na maroroya vakatikitiki me noqu soli i valenilotu.

Oqori na veika e cauraka toka mai o Anaseini Rokosagale e dua na marama ni koro ko Lomai mai na yasana o Naitasiri, ka volivolitaki tiko e na makete levu e Suva e na siga Vakaraubuka ni macawa sa oti.

E kaya o Rokosagale ni veisiga Lotulevu taucoko, e rau dau veivuke kei tamadratou na gone e na kena vakarautaki na nona i voli me kauta mai e na makete levu e Suva, ka sa oti mai oqo e 24 na yabaki na nona vakayacora tiko ka sega vakadua ni bau vakacauoca kina.

E da raica votu vua na marama oqo na matadredredre e na gauna e vakatarogi tiko kina e na Na i Lalakai, salavata toka na nona veiwali ka ni sa vakarau cagina sara toka ga na nona i voli e na Vakaraubuka.

E kaya na marama yabaki 46 oqo ni kauta mai na siga oya e 10 na i vutu dalo, 10 na i vesu duruka, rourou 2 na daseni, tavioka kei na rua na kisi jaina ka vakadreu ga e vale.

Tomana ni sa vakarau kece na nona i voli e sa qai dau vakavodoki mai e na bavelo, ka laki vodo sara e na keria e na matasawa ni koro ko Lomai, ni bera ni qai vakavodoki mai e na keria e na 7 na kaloko e na mataka lailai.

E kaya na marama Radini Qase oqo, ni i sau ni keria e $140 ni jajitaki mai, ka ra dau tauya $7 dua na pasidia, ka sega ni jajitaki na nodra i voli.

Kuria ni gauna sa oti kina na nodra volivolitake era na qai solia e $3 me nodra i vodovod lesu tale ki nakoro.

E kaya o Rokosagale ni i lavo kece e rawa mai na nona basa, e vagolei vakatabakidua sara ga ki na vuvale, lotu kei na vanua.

Sa nona i vaklasala ga o Rokosagale ki vei kemuni na cauravou kei na gone yalewa, ko ni sa sega ni cakacaka tu e na gauna oqo, ni yalovinaka sara ni lesu ga ki dela ni yavu ka laki teivaka na qele, ka ni na kunei kina na i vurevure ni bula kei na tiko vinaka.

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.