Qaqarauni ena vula i cagilaba UNAISI RATUBALAVU | Monday, April 16, 2018

ESA vakavakarau tu oqo na vanua o Viti ena vuku ni cagilaba o Keni ena tekivu ni macawa oqo.

 Eda raica ni sa yaco veitaravi tiko e Viti na cagilaba kei na veisau ni draki ena vuku ni vula i cagilaba eda donuya tiko ena gauna qo.

 Dina ni sa donuya tiko na i karua ni macawa ni vula o Evereli, eda raica ni ra sa tukuna tiko na daunidraki na cava kei na draki suasua, kei na ualuvu eda donumaka tiko.

 Ena gauna oqo e ra sotava tiko na dredre na lewenivanua mai na yasayasa vaka- Ra kei na Vualiku ena vuku ni draki suasua kei na cava o Josie ena mua ni macawa ni Siga ni Mate.

 E da raica kina ni ra mai leqa kina e vica na wekada ena vuku ni luvu kei na kena takosovi na uciwai kui kaukauwa ena vuku ni draki eda sotava tiko.

 Eda raica ni levu na lewenivanua era sa sega ni qai veitosoyaki ena siga Tusiti ena vuku ni vakaro kei na kena rokovi na cagilaba kei na cagi tataba ena tarai Viti mai.

 E sa vakanuinui tu o ratou na tabana ni matanitu ni da na vakarautaki keda vakavinaka na lewenivanua ena vuku ni draki eda sotava tiko edai.

 Na veika e dodonu me da na vakarautaki keda kina, na kena taqomaki o ira na luveda, na kakana meda na kania, na nodra I sulu, e vei na vanua ni drodro meda na lako kina ni sa yaco e dua na leqa tubu koso.

 E ka bibi meda na maroroya talega na i tukutuku bibi me baleti keda me vaka na noda pasipote, na noda i vakadinadina eso me vaka na FNPF Joint Card, na noda Voter ID, na noda i vola vakadinadina eso, me rawa ni vakarawarawataka na noda kere veivuke ena baqe se ena veitabana eso ena gauna e sa oti kina na cagilaba se leqa tubu koso.

 Na noda maroroya vinaka na veika eda vakamareqeta me na vakadeitaki tu ka ra vakavulici na luveda na veika e dodonu me ra cakava ni sa yaco e dua na leqa tubu koso.

 E na gauna talega oqo, e ka bibi me da rogoca na nodra i vakasala na daunidraki kei ira na tabana ni matanitu.

 Kevaka e sa soli na i vakaro me kua na veilakoyaki, se me da gole ki na dua na vanua cecere ni se siga toka, e ka bibi na talairawarawa ena i vakasala.

 Na noda talairawarawa kei na noda cakacakataki keda ni se siga toka, ka meda kakua ni vuki bera, ka mai vosavosa tiko ni sa kasova na sucu.

 E da sa vakadreti na lewenivanua ni bibi na noda vakarautaki keda vakavinaka ka tu na i tuvatuva ni yaco mai e dua na leqa tubu koso.

 Ki na qito, eda sa vakanuinui ni ratou na rawata mai na i matai ni koula mai na Commonwealth Games na noda toa ni vala  lewe ya vitu  ena mua ni macawa oqo.

Sa rawa mai na koula ena Olympics, sa qai vo qo na koula ena sotasota ni Commonwealth Games.

 Sa vakavinavinakataki talega o Eileen Cikamatana ena i sevu ni koula vei ira na noda marama ena sotasota ni Commonwealth Games.

 Vinaka vakalevu na gugumatua.

Home | Top
Nai Lalakai Online background
FIJI'S iTaukei language newspaper Nai Lalakai went online on March 2nd, 2012, as it celebrated its 50th anniversary. Nai Lalakai editor Anare Ravula said this was a major milestone being the first iTaukei newspaper in the world to go online.
"This will be a great advantage for locals living overseas, particularly our readers who are soldiers and Fijians serving in the British Army," Mr Ravula said.
"I am delighted with it, it's a major project and it is a major achievement for the newspaper and greater service to our readers offshore," The Fiji Times publisher Hank Arts said. "I think the people will love it," he said.
The Fiji Times editor-in-chief Fred Wesley voiced similar sentiments and added uploading the vernacular newspaper online was part of The Fiji Times' service to its readers.
"We hope this site will assist our readers in terms of helping them understand and value the iTaukei language, culture and traditions," Mr Wesley said.